Kerskous vir die ietwat ouer kind

Vir die ietwat ouer kinders het ons vele boeke, te veel om hier te noem, maar ’n paar staan uit. Gaan krap maar in die boekwinkels. Klein voorblaaie vertel jou nie hoe pragtig die illustrasies is nie. Die volgende vier is almal volkleur:

’n Hond sal dit beslis nie wees nie (Martin Baltscheit) gaan oor daardie tweede boetie of sussie, en hoe hanteer die eerste kind dit. Skreeusnaaks, maar baie slim gedoen.

Oscar en die honger draak (Ute Krause). Die boeke vertel die verhaal van ’n seun wat die draak moet oortuig om hom aan te stel as kok, eerder as om hom op te eet! Jy gaan lê soos jy lag.

Ewe snaaks is Prinses Anna (Susan Opel-Götz) wat haar prins baie dringend moet kry, maar die einde is werklik verrassend. Hierdie prinses is nie ’n sissie nie en sy weier om op die liefde te sit en wag!

Praat van die liefde: Die ongelooflike liefdesverhaal van meneer Morf (Carll Cneut) is ’n kinderboek, maar so mooi dat grootmense dit ook sal verslind. Hoe gemaak as ’n sirkushond alleen raak en sy ware liefde gaan soek? Dis ’n pragtige boek, en beslis iets vir die Kerskous.

Vir die amptertiener staan Bettina Valentino deur Niki Daly uit. Bettina is mal oor kuns en beleef haar eerste verliefdheid wanneer ’n nuwe kunsonnie haar skool binnestap op sy kaal voete. Bettina Valentino is gemik op lesers van Graad 4–7. Dis ’n kort roman propvol illustrasies (in swart en wit).

Soek julle nie-fiksie vir jong lesers?

Gaan vra jou boekwinkel vir volgende twee tekste – hulle is in volkleur. Veral seuns sal gek wees hieroor:

1. Die storie van die wetenskap (ISBN: 978 1 86919 333 1)

2. Die storie van uitvindings (ISBN: 978 1 86919 364 5)

Julle kan luister hoe ek hieroor gesels, deur die potgooi van 21 Desember 2010 af te laai van RSG se webwerf. Daar is ook baie lekker gesprekke met NB en LAPA oor hulle boeke, so dis nie net my stem wat julle sal hoor nie! Hier is die skakel.