Brel & Piaf: Paryse Tweesang

Ek kan hierdie stuk nie hoog genoeg aanbeveel nie. Ek ken Herman se musiek goed en werklik, julle sal nie spyt wees nie. Dit speel by die Woordfees, en enige een binne ’n radius van 400 km kan maar inry daarvoor. Daarna skuif dit na die Brooklynteater in Pretoria. (’n Baie lekker teater, ek was al daar.)

Herman van den Berg & Jolette Odendaal

Matthys Maree (klavier) & Strykkwartet

Franse Kafeemusiek in uitstekende Afrikaans

By die US Woordfees op Stellenbosch

21:00 Saterdag 12 Maart by die US

Bespreek by Computicket.

In die Brooklynteater, Pretoria

Vrydagaand 18 Maart - 20:00

Saterdagaand 19 Maart- 20:00

Sondagmiddag 20 Maart 15:00

Maandagoggend 21 Maart 11:00 (openbare vakansiedag)

Besprekings, www.brooklyntheatre.co.za of by Computicket

Na die sukses van die Afrikaanse Jacques Brel-kabarette My man, Jacques Brel en Die tere oorlog van die liefde, slaan die Franse chansonvertalers Naómi Morgan en Bernard Odendaal hul hand in Afrikaans aan die werk van Édith Piaf (gebore as Édith Giovanna Gassion).

"Piaf" is 'n Franse omgangswoord vir "mossie" - 'n bynaam wat sy op twintigjarige ouderdom gekry het.

Ses van haar chansons, waaronder die immergroen treffers La vie en rose (wat "Die blos van rose" geword het) en Hymne á l'amour ("Loflied op die liefde"), is pas vertaal vir 'n kabaretproduksie oor Parys as stad van die liefde. Dit word gekombineer met vertalings van ses Jacques Brel-werke. Onder laasgenoemde tel 'n paar wat die heel eerste keer in Afrikaans te hore sal wees. In die roerende Le Prochain Amour (Nuwe Liefde) stel Brel sy ervaring van die liefde en verlies daarvan op die voorgrond, en die diksie-uitdager La valse á 1 000 temps ("Die wals in duisendslagmaat") oor die maalkolk van musiek en verleiding wat dié stad van die liefde bied.

Brel in Afrikaans het al sinoniem met Herman van den Berg geword. Die nuwe vertalings sal aan Jolette Odendaal die geleentheid bied om Piaf in Afrikaans te vestig.

Die 12 liedjies oor liefdesverhale uit 'n Brel- en Piaf-perspektief wat teen 'n Paryse agtergrond afspeel, word ingelei deur 'n verteller en geïllustreer deur musici en projeksies van klassieke foto's van Parys uit die 1950s. Maak maar gereed om romanties meegevoer te word deur woorde en melodieë wat 'n mens nooit wil vergeet nie!

Met Herman van den Berg & Jolette Odendaal (sang), Naómi Morgan (verteller), Matthys Maree (klavier) & strykers. Regie word behartig deur Chris van Niekerk.

Terloops: Hierdie teks kom grotendeels van die Brooklynteater af, die foto ook. Dankie aan hulle. Bel hulle by (012) 460 6033.