Goeie dag Netta

Mei 30, 2011 in Sonder kategorie

Lettie Botha [[email protected]]

Sent: Wed 2011/04/06 12:59 AM

To:     [email protected]

Dit was darem alte gaaf van Bertussie, my jongste kleinseun, om vir my hierdie kompertjie persent te gee. Mens raak mos maar eensaam as die ouderdom so tussen mens se blaaie kom lêplek kry.

Onthou jy Netta, toe ons nog briewe geskryf het op daardie mooi skryfblokke? Ek onthou nog my gunsteling was die bloue met die blonde meisie wie se hare so oor die bokant van die bladjie gekartel het. Ek het al my briewe daarop geskryf. Joune was altyd daardie geel papier met die Sonneblomme so aan die linkerkand. Bertussie sê ek kan my briewe op die kompertjie ook so mooi maak, maar ek is te bang vir al hierdie volksvreemde woorde wat vir my loer. Wat vir ‘n ding is insert? My gunsteling posseël was ook die een met die Protea. Kan jy glo ons kan nou briewe stuur sonder om ‘n posseël op te plak? Bertussie sê ek kan ‘n ‘signature’ op my eposse sit, maar ek mos nou nie ‘n vername mens nie.

Ek is ook dankbaar dat jy ‘n kompertjie aangeskaf het. Bertussie sê algar vir my, as Tannie Netta een kan gebruik dan kan ek ook. En hier sit ek wraggies en tik vir jou ‘n briefie so met my twee wysvingers. En kan jy glo Netta dat hierdie brief so oor die lug sonder koevert daar by jou gaan aanland!?

Bertussie het vir my gesê ek moet vir my ‘n ‘account’ – die jongmense wat die tale so meng – daar op Facebook gaan oopmaak. Maar het hard teëgeskop want op my ouderdom met die pensioen wat so skraps is, wil ek nie nog rekeninge hê nie. Hy het lekker gelag en toe maar vir my die rekening daar oopgemaak. Dit is blykbaar heeltemal gratis. Dit wil ek nog sien, mens kry mos van vamelewe se tyd niks gratis nie of wat praat ek mens? Daar is mos altyd iets in die fynskrif. En daardie plek se fynskrif is alles in Engels wat ek nie so lekker verstaan nie. So ek gaan maar vinnig in die oggende loer wat aangaan en weer in die middae. Ek wil nou nie ‘n groot rekening opbou en dan die einde van die maand moet betaal nie.

Ek spog darem met drie vriende daar. Ou Stefaans van die meenthuis hier neffens my, Bertussie en kan jy glo, ‘n mannetjie genaamd Ahmed. Ek wonder hoe hy nou aan my gekom het? Maar ek was so opgewonde toe ek my eerste ‘friend request’ kry, dat ek sommer dadelik aanvaar het. Ek weet jy gaan my oor die vingers tik omdat Ahmed ‘n Indiër is, maar daai tyd is mos al lankal verby of wat praat ek? Hy is so vriendelik, die Ahmed en stuur elke dag vir my ‘n boodskappie. Nou die dag vertel hy my dat hy so bly is dat hy my opgespoor het na maande se soektog. Blykbaar is hy ‘n vername prokureur daar in Indië en een van sy ryk kliënte is onlangs oorlede. Dis toe dat sy soektog vir my begin het want die man het sy fortuin vir ene ‘Mrs L Botha’ gelos. En die is nou ek Netta! En dit klink vir my na ‘n allemintige bedrag! Die wêreld raak nou ‘n vreemde plek. Wie sou kon raai dat, wanneer ek die dag myself op die internet begewe, ek ‘n fortuin gaan losslaan? Hy noem my ook ‘Dear’ en het my vertel dat hy my foto gesien het en gedink het ons is ‘kindled spirits.’ Ek ken tog net een tipe spirits en dis daardie pers goed. Ek hoop nie hy gebruik daai goed vir ‘jy weet wat’ nie want hy klink na so ‘n gawe jongman. Ek dink ook die geel blom in my hoed op my foto laat my gesig ‘n bietjie jonger lyk. Die dat hy my raakgesien het tussen al die ander mense. Dis ‘n baie vleiende kiekie van my, mens kan tog sekerlik nie enige kiekie daar plaas nie, blykbaar kan die hele wêreld dit mos bekyk!

Ek moet juis more gaan en afskrifte maak van my ID en ‘n bewys van my bankstaat vir Ahmed aanstuur. Ai, Netta, miskien sal ons droom van ons huisie by die see vir ons twee tog nou bewaarheid word. Ek glo die belasting sal ‘n groot hap uit die geld vat, maar dit wat oorbly sal ons twee tog goed kan aanwend. Ek kort juis ‘n nuwe gehoorstuk en die valstande begin ook maar druk op plekke wat dit ongemaklik maak en het jy gesien hoe duur raak die Green Cross skoene deesdae? Dis al wat ek kan dra want die skoene druk nie op my eelte nie en die sole is mos spesiaal gemaak dat ons ou mense nie gly nie.

Ek het nou die dag daar op Bertus se rekening gaan loer op Facebook. Kan jy glo die kind het meer as ‘n duisend vriende? Ek wonder of hy hulle al almal in die oog gekyk het?

Die ou manne daar op Facebook is ook maar spils Netta. Dis ‘n alewige ge’pokery’! Ek het mos so die kinders staan en afluister daarom weet ek wat dit beteken! Ek kry net nie die kloutjie by die oor van hoe mens nou gaan ‘poke’ op die internet nie! Ag, lekker giggel ek nou. Ek en jy sou lekker gelag het oor die dinge toe ons nog bog snuiters was! Bertussie het my ook gewaarsku oor ‘applications’ wat net viruse is. Mens kan tog nie op ons ouderdom nog staan en virusse optel veral as die jig so in die heupe begin vasttrap plek kry nie. En soos dit is, is my karige mediese fonds al lankal uitgeput met al die pille wat ek elke maand moet gebruik. Blykbaar laai dit ook wurms af op mens se kompertjies en nie eens Doom kan daarvan ontslae raak nie! Baie vreemde verskynsels wat met die kompertjies hulle verskyning maak. Lyk my mens moet banger wees vir ‘n komper virus as vir die een wat sonder ‘n sneesdoekie langs jou nies. Kan jy nou meer?

Iederwel, ou Stefaans het gister hier vir my kom kuier met ‘n enkelte geel roos. Mensig Netta, daai roos ruik nog soos ‘n regte roos! Jy wil mos daai geur alewig inasem en ruik en ruik tot dit wegraak. Nie soos die bosse gekleurde blomme wat Bertussie hier aandra wat toegedraai is in sellofaan nie. Die blomme het mos so regte winkelreuk.

Ou Stefaans het maar ‘n leepoog vir my al vir jare van my Frans gesterwe het. Hy sê die roos herhinner hom aan my. Pragtige geel kop – verwys seker na my blonde hare wat nou so stuk stuk grys begin raak en dat ‘n mooi vrou nie sonder ‘n paar dorings kan wees nie. As ek nie my sonde ontsien nie, sal ek dink dat die man by my aanlê! Hy kom algar hier aan met sy netjiese geparste broek en die hare so mooi teruggekam en in plek gehou met Brill Cream. In die begin het hy my met die hand gegroet en soos ‘n skoorsoek seun buite die deur gestaan. Nou trek hy my nader ek soen my op die mond en stap dan sommer in. Baie stuitig en ek dink die man begin al gemaklik raak en dit wil lyk asof hy hier wil nesskrop. Hy het al lankal die ‘lazy boy’ in die hoek as sy eie geannekseer.

Bertussie het nou die dag vir my daai voëltjie plek op die internet gaan wys. Hulle noem dit Twitter. Daar kan jy nou ook boodskappe skryf van jou dag. Nou vra ek jou, wie sal wil weet van die rumatiek in my vingers en die winderigheid wat sy verskyning maak nadat ek my gunsteling groenboontjies geëet het? Ek dink daardie hoekie vir eensames is maar vir die voëls. Ek wil my nog nie in daardie nes begewe nie.

Wat maak mens op mens se oudag ook met so baie vriende en ‘fans’. Soos wafferse sterre moet mens nou ‘fans’ en ‘followers’ hê. Ek is maar tevrede met ou Oortjies, my hond, wat my heeldag volg.

Maar dis nou eers genoeg van my. Ek weet nie of die goed werk soos telegramme waar jy per woord moet betaal nie. Ek sal eerder afsluit en wag dat jy my antwoord. Mens moet maar altyd besparing in gedagte hou.

Stuur maar groete daar waar jy is en laat weet tog van jou.

Groete

Lettie

2 antwoorde op Goeie dag Netta

  1. HeavyHenry het gesê op Mei 30, 2011

    🙂

  2. Modigliani het gesê op Mei 30, 2011

    Hierdie was nou oulik 🙂

Laat 'n Antwoord

Jou e-posadres sal nie gepubliseer word nie.