Laasweek het ek my seun afgesien na ’n rehabilitasie sentrum.  Die rede?  Dagga!

Ek het ’n pragtige seun gehad voor hy dagga leer ken het.  Behulpsaam, fluks, vriendelik, altyd ’n grappie, liefde vir mens en dier, kortom, ’n sonskynkind!

Maar ek moes kyk hoe hy verander in ‘n kind wat nie meer omgegee het nie.  Skoolwerk het met ‘n spoed agteruitgegaan, sy vriendekring het verander, hy het vreeslike gemoed skommelings begin ondergaan, aggressief geraak tot so ’n mate dat hy nie omgegee het wat hy gesê of gedoen het nie.  Hy het gejok, bedrieg en gesteel.  Sy slaap en eet patrone het verander, sy oë was meeste van die tyd rooi, hy het geheimsinnig geraak.  Ek het aande wakker gelê en wag dat my kind, van wie weet waar, huis toe kom.  Hy het sy diefwering van sy kamer afgesaag sodat hy kon kom en gaan soos hy wou.  Geen respek of agting vir gesag of dissipline gehad nie en het uitdagend geraak.

Klink dit vir jou na die simptome van heroïen, kokaïen of enige ander sogenaamde harde dwelm verslawing?  Ja!  Al die simptome daarvan, maar dit is dagga. 

Almal probeer dagga afmaak as ‘n ‘sagte’ dwelm met geen/niks newe-effekte nie, maar laat ek vandag vir jou vertel, liewe ouer, dagga se simptome vat dalk langer om hulle verskyning te maak, maar die dag as hulle manifesteer, is hulle daar om hulle verwoestingswerk te begin en deur te voer.  En die dag wanneer daardie simptome hulle koppe uitsteek, is dit al amper te laat en is jou kind reeds so vasgevang in die kloue van hierdie sogenaamde onskuldige dwelm, dat slegs erge ingryping jou kind daarvan kan verlos.

Ander gevolge van dagga gebruik sluit die volgende in:

1. Die kinders se groeiproses raak geïnhibeer
2. Kort termyn geheue probleme
3. Slaaploosheid
4. Steriliteit
5. Emfiseem en ander longprobleme
6. Emosionele en spirituele probleme
7. Algemene afname in gesondheid
8. Angstigheid wat lei na paranoia
9. Dagga gebruikers raak apaties en dit kan duidelik in hulle skoolwerk gesien word

Dagga is gewoontevormend en veroorsaak ook die effek waar die gebruiker mettertyd groter ‘dosisse’ moet gebruik om dieselfde ‘high’ te kry.  Dit is ook ‘n groot rede hoekom dagga gebruikers aanbeweeg na die sogenaamde ‘gevaarliker’ dwelmmiddels.

TEKENS OM NA UIT TE KYK:

1. Bloedbelope, rooi oë of slaperige oë
2. Onnatuurlike dors of honger
3. Onbeheerbare buie en gemoed skommelings
4. Babbel baie of onbeheerde gegiggel
5. Slegte besluitneming
6. Vlekke op hande

FISIESE TEKENS

1. Dagga pitte/sade wat rondlê
2. Dagga stof in sakke van klere
3. Gebreekte bottels of bottel nekke.  Kyk ook maar uit vir gewone 2 liter bottels met ‘n gat in.
4. Stukkies pyp
5. Rizzla masjien en papiertjies met of sonder rasta kleure van rooi, groen en geel
6. Geheimsinnige oproepe
7. Snaakse reuk in die huis en wierook wat gebrand word
8. Oogdruppels en Lip Ice wat baie gebruik word
9. Leë banksakkies.  Gewoonlik die kleiner sakkies
10. Lighters en vuurhoutjie boksies wat rondlê
11. Onhigiëniese leefstyl

Moet onder geen omstandighede dink dat jou kind te cute/oulik/intelligent/begaaf is om in die kloue van dagga te beland nie.  Dit vat net een verkeerde vriend en jou kind neem sy eerste tree op hierdie pad.

Moet ook nie dink dit is moeilik om dagga te bekom nie.  Dit is so maklik vir ‘n kind om dagga te koop as wat dit vir ons is om brood en melk te koop.

Dagga is ook nie duur nie!  ‘n Kind kan maklik met sy gewone sakgeld daarmee begin, maar soos hy die paadjie loop, raak dit al hoe duurder omdat hy meer en meer daarvan nodig het.

Moenie dink omdat dagga ‘n sogenaamde ‘sagte’ dwelm is, dat jy jou kind maklik daarvan gaan verlos nie.  Die teenoorgestelde is waar!  Dit is net so moeilik om van dagga af te kom as wat dit is om van enige ander dwelm te kom.  Sagte woorde gaan nie help nie.  Dit gaan nie help om jou kind met handskoentjies te hanteer nie.  Dit het ek op die harde manier geleer.

Daadwerklike ingryping is die enigste antwoord.  Hier kom die ou spreekwoord van “You have to be cruel to be kind” goed te pas.  Jy sal moet ‘n besluit neem, ingryp en daarby staan al breek jou hart. 

Dagga is nie grappies nie.  Dagga is nie speletjies nie.  Dagga is ‘n harde werklikheid!  Dagga ondermyn gesinne en wedersydse respek.  Dagga breek af en verwoes. 

Dagga en sy gevolge moet nooit onderskat word nie!

Partykeer is dit asof die lewe jou tot stilstand ruk en dit is wanneer jy jou lewe onder die vergrootglas moet sit en hom fyn ondersoek!

Vandag was by verreweg DIE moeilikste dag wat ek al ooit in my lewe beleef het.  En die wat kinders het, sal met my saamstem, dat wanneer ‘n kind op die verkeerde pad is, en jy wat ouer is, besluite moet neem wat jou seerder maak as jou kind, dan weet jy werklik wat liefde aan ‘n mens kan doen.

Ouerliefde is ‘n goeie ding, maar wanneer jy jou kind tot in die afgrond in bederf, of eerder soos ek altyd sê: In die afgrond in jammer kry, dan het jy ouerliefde te ver gevat en dan moet jy, ten alles koste met die gevolge saamleef.

En so sal ek met die gevolge moet saamleef.  Elke dag, maar ek weet dat die besluit wat ek, met die hulp van ander, geneem het, die regte een was/is/en altyd sal wees.

Julle weet van die blog wat ek vir my tienerseun opgedra het.  Die Liefdesuitdaging?  Ek is bly dat ek dit gedoen het en dit het wel positiewe gevolge gehad, maar ongelukkig was dit ‘a bit too little, and a bit too late.’

Vandag wens ek dat ek strenger met die mannetjie was.  Ek wens dat ek hom nie toegelaat het om my om sy pinkie te draai nie.  Ek wens ek het dieper gekyk, dieper gedelf, kwaaier gewees en fermer op my beginsels gestaan het.  Maar ek het nie want:

1. Ag shame, hy is ‘n kind wat deur ‘n egskeiding moes worstel

2. Ag shame, hy moes verwerping ervaar

3. Ag shame, hy het ‘n stiefpa

en so het ek hom ge’ag shame’ tot in die kloue van ongewenste elemente.

Laat hierdie vandag ‘n waarskuwing aan elke ouer daarbuite wees.  Moenie dink jou kind is te cute, oulik, mooi, intelligent om verkeerde paaie te vat nie.  Moenie jou kind so jammer kry en hom nooit die gevolge van sy dade/woorde laat dra nie.

My pa het ‘n mooi ding wat hy altyd sê … konsekwente dissipline … jou ja, jou ja en jou nee, jou nee.  Maar ek het my ‘nee’ telkemale verander in ‘n ‘miskien’ na ‘n ‘ja’ want “ag shame”.

Ek het hom gehok ja … maar gewoonlik na die eerste aand gesê “shame, wat moet die kind nou doen?”, sy selfoon weggevat en dan “shame, hoe moet hy met sy maats kommunikeer?”, hom kamer toe gestuur en dan “waarmee gaan die arme kind homself mee besig hou?” … en boeta, het hy geweet hoe om dit tot sy voordeel te gebruik!

Ek besef vandag dat jy as ouer, VIR jou kind MOET besluit en DAARBY MOET STAAN, want anders is lang krokodiltrane jou voorland.  Ek is eerstehandse bewys daarvan!

Jy is ‘n ouer en jy MOET in beheer wees!

Baie dankie vir elke gebed en elke woord van bemoediging.  Glo my, hulle sal my dra soos die liefde van Lifiki, my ander seun, my Pa, my Liewe Sussie, my vriendin en al die ander wat my die afgelope paar maande deur diepe waters gedra het.  Julle is elkeen wonderlike mense en ek hoop dat ek ook eendag daar vir julle sal kan wees.

so as jy in jou hart voel dat jy vir iemand wil bid, ek staan voor in die ry.

Waarvoor jy kan bid vir my:

1.  Aanvaarding van ‘n situasie

2.  Vrede in my hart

3.  Innerlike krag om sterk te staan

Byvoorbaat dankie.

jy hier gewerk het?

Ons het altyd iets om oor dankbaar te wees ….

As mens wil hê die tyd moet vinnig verbyvlieg, dan tik die sekondes so sleepvoetend elke minuut om.

Maar as jy wil hê die tyd moet stilstaan dan het daardie horlosie ‘n oordosis Duracell in!

Hoe maak mens dat tyd stadiger beweeg?  Net vir twee dae?

Klein, klein was jy met jou sagte blonde haartjies

soos ‘n apie op my sy gelê met digtoe ogies.

Vonkel in die oog, blitsig op en af.

Wawiele, tiekiedraai, lig en laf.

Vinnig om ‘n grappie te maak

met almal gesteek die draak …

maar al hoe stiller geword het jy

soos die groengif se walms jou ry.

Vonkel in die oog verander, rooi soos bloed

ek sien hoe die kwaad en vrae in jou woed.

My hande afgekap, my brein verstomp,

probeer jou help, maar ek is lomp.

Ek soek jou in jou gedagtes se maalkolk

verdwaal, val en struikel in die rookwolk

Ek wil jou styf, styf vashou

terwyl jou taal my uitjou

Ek wil jou verstaan, vasdruk, beskerm en troos

verby woorde skerp soos dorings van ‘n roos

Eendag as die kwaad verdwyn

sien ek uit na weer, ons samesyn.

Ek groet jou nou met ‘n sagte vaarwel

en sal elke dag in my hart aftel.

Ek bid dat die pad wat jy nou betree

jou onsekerhede, weg sal vee.

Ek bid dat jy gesond sal word

want vir hartseer, is die lewe te kort.

en slegs een gebreekte nael!

Ek weet julle vind dit seker vreemd dat ek spog, maar die wat my goed ken, weet dat ek nie juis ‘n tuinwerker van formaat is nie 🙂

Vergun my die verleentheid om vandag ‘n bietjie smaak- en taktloos te wees …

“Pop” goes the weasel …

Krismis prezzie freak!!

Ja, wat meer kan ek sê?  En voor al die “ek haat die kommersialisering van Kersfees” mense my oor die kole haal, vra ek om verskoning, maar ek kan dit nou nie wegsteek nie …

 

Daar is maar net niks lekkerder as om persente uit toe soek, papier te sny, linte te bind en die kleurvolle pakkies om die boom uit te stal nie!

 

Ek begin al sommer Oktober uitkyk vir wat ek wil hê.  Dan begin ek liggies skimp en later dan wys ek net so ‘tersluiks’ ‘n prentjie van wat ek wil hê, ag ek glo al die vrouens ken maar hoe om te kry wat mens wil hê!

 

Julle mag natuurlik vra hoekom ek so is en die antwoord is heel eenvoudig.  Nadat ek eendag vir kersfees ‘n stel OK Bazaars potte vir Kersfees gekry het, het ek net besluit, semuhr daarmee.  Van nou af sal ek seker maak dat ek nie met so ‘n aangeplakte ‘smile’ sit en sê “Ag baie dankie, dis presies wat ek wou gehad het,” terwyl ek binne voel dat ek die gewer van die persent saggies in sy peetjie kan stuur nie! 

 

Hier is natuurlik ‘n klein waarskuwingtjie vir die manne van blogland – ‘n Vrou wat daarvan hou om potte, panne, voedselverwerker, strykyster, ketel, koffiemaker, stoompot of enige ‘nuutste kombuistoestel of gadget’ te kry vir Kersfees of haar verjaarsdag of vir Moedersdag – is die uitsondering op die reël!  En as jy dink daai voorskoot lyk oulik op die blond in die winkel … moenie die voorskoot huis toe vat nie, vat eerder die blond sodat sy die skottelgoed na die Kersfeesete kan was!

 

En net om te wys dat ek nou nie heeltemal materialisties is nie, is hier ‘n liedjie vir julle wat al van gister in my kop draai ….

 

 

 

En as hy nie wys nie … hier is die link –>  http://www.youtube.com/watch?v=1-9lBlQmimI

Ek koop mos in die laaste tyd net tydskrifte wat my iets kan leer soos ‘Your Business’ en ‘Entrepreneur’ en dan ook die Huisgenoot vir Dr So-en-so se onmisbare raad oor allerdaagse goedjies.

Maar eergister is daar ‘n ‘glossy mag’ met die allerpragtigste vrugtevlieg sonbril as deel van die paket, en siende dat my vorige vrugtevlieg sonbril gesneuwel het onder my agterstewe, besluit ek dadelik om die ‘glossy’ aan te skaf.

 

Natuurlik, dink ek by myself, slaat ek sommer twee vlieë met een klap.  Ek kry ‘n nuwe sonbril en het sommer op die koop toe, lekker leesstof!

Dis toe ek die ‘glossy’ oopslaan, dat ek onthou hoekom ek nie meer die snert koop nie.  Die tydskrif is ‘n allermintige dikte van 184 bladsye!  Jy sal nou dink dit sal my ure besig hou, maar helaas … slegs 58 bladsye van die 184, bevat eintlik leesstof.  Die res is advertensies en advertensies en nogmaals advertensies!

As mens dan ook die 58 bladsye se ‘leesstof’ van naderby bekyk is die artikels ook volgeprop oor watter maskara jou wimpers sal laat krul van lekkerte, watter onderlaag die beste is om die vorige aand se kuier weg te toor, watter drankies jy saam met watter eetgoedjies jy moet voorsit en ook watter bril die beste sal wees sodat jy verby al die advertensies kan kyk en jouself kan oortuig dat jy waarde vir geld gekoop het!

Van nou af lees ek net blogs en natuurlik die Huilgenoot 🙂