Jy blaai in die argief vir 2009 Augustus.

Hierdie ding sal NOOIT weer tussen my bene toegelaat word nie

Augustus 31, 2009 in Sonder kategorie

Camel

Saterdag was dit mos Straatfees hier op Klerksdorp en nadat ons al die Nigerian stalletjies besoek het was die enigste opwinding oor – ‘n kameelrit!

Ek is nie juis ‘n groot diereliefhebber nie en het nog nooit die begeerte gehad om op ‘n Kameel se rug te lande te kom nie.  Maar die liefde oorwin alles en op aandrang van Lifiki bestyg ek die dierasie se rug.

Goeie genugtig, dit is ver van die aarde af!!  En ek praat nie eens van die ongemaklike saal nie!  Daar is nie eens ‘n stiebeuel om die voete in te rus nie.  En soos die woestyndier vorentoe beweeg skuif mens so al vorentoe en met die geskuiwery voel dit later asof mens ‘n wedgy het!

Alles het heel goed verloop tot die afsakslag.  Jitte!  Met die vorentoe sak tref my binnebene so net bokant die knieë daai raam van die saal dat ek twee sulke pers kolle het!  Gelukkig met die agterstewe-sak word ek wonderbaarlik verlig van die wedgy!  En om alles te kroon laat die dierasie ‘n allemintige wind toe sy maag die grond tref!  Goeie genugtig!  Wat eet die goed?

Nodeloos om te sê ek het Sondag bakbeen geloop soos ‘n Cowboy en van die gebruiklike smk’ie was daar geen sprake nie.

Die kwessie van “….” kan iemand my help?

Augustus 24, 2009 in Sonder kategorie

Ek soek nou al lank na die antwoord op die volgende:

As ek wil skryf wat iemand sê doen ek dit so?

“Ek wil iets skryf,” sê hy.

Of is dit

“Ek wil iets skryf.” Sê hy.

En as dit so moet wees:

“Ek wil iets skryf,” sê hy onseker.  “Iets oor blogland se dinge.”

Waar sit mens die jotas en tittels, die aanhalings en komma’s?

Presies hoe haal mens nou iemand aan?

Nota aan self *As ek eendag weer my lewe sal oor kry, sal ek oplet in Mev Venter se klas*

Die kwessie van “….” kan iemand my help?

Augustus 24, 2009 in Sonder kategorie

Ek soek nou al lank na die antwoord op die volgende:

As ek wil skryf wat iemand sê doen ek dit so?

“Ek wil iets skryf,” sê hy.

Of is dit

“Ek wil iets skryf.” Sê hy.

En as dit so moet wees:

“Ek wil iets skryf,” sê hy onseker.  “Iets oor blogland se dinge.”

Waar sit mens die jotas en tittels, die aanhalings en komma’s?

Presies hoe haal mens nou iemand aan?

Nota aan self *As ek eendag weer my lewe sal oor kry, sal ek oplet in Mev Venter se klas*

Ai, dis sooooo negatief!

Augustus 24, 2009 in Sonder kategorie

So swarrel ek vandag op die internet rond op blogs, forums, nuusblaaie ensovoorts en dit val my op dat meeste mense baie negatief is. 

Gisteraand in die kerk het die pastoor ‘n wonderlike ding gesê:  “Wat die hart van vol is, loop die mond van oor.” 

Duh!!!  Eu oue spreekwoord nê!  Ja, baie oud, maar slaan ons werklik ag hier op?  Besef ons wat dit beteken?  Vir my beteken dit dat dit wat in my hart is, in my sê, doen en late te vore kom.  Ons is meestal so gevul met negatiweteit dat dit al is wat uit ons monde kom.  En hierby sluit ek myself ook maar in  Dit is baie makliker om negatief te wees as wat dit is om die positiewe te soek en uit te lig. 

Ek hoop almal se harte is more so gevul met positiewe gedagtes dat dit sommer dwarsdeur die cyberwëreld sal skyn soos ‘n baken van hoop, liefde en goeie dinge.

Klop, klop, klop hier aan my hart

vee weg die spinnewebbe

wat my glimlag so tart!

Trippe, trappe, trone

sagkens deur my dag.

Verlig vir my die skone

die vreugde wat lê en wag.

fluister

vrees

verdwyn

lig

lewe

ons kan skyn!

Positive Energy

Vir Anha

Augustus 18, 2009 in Sonder kategorie

Goeie more daar!

Ek hoop hierdie dag vir jou is vol sonskyn en wonderlike positiewe ervarings.

Ek voel dat jy ‘n vrou is wat deur diep waters gegaan het en nou in die proses staan om jou kop op te lig, die wêreld vierkantig in die oë te kyk en ‘n ommeswaai in jou lewe te bewerkstellig. 

Jy is ‘n sterk vrou met diep waardes.  Dit maak nie saak dat ons foute langs die pad maak nie, wat wel saak maak is die persoon wat ons anderkant uitkom.

Wat ek vir jou wil sê is, bly so spesiaal soos wat jy is want jy is ‘n uitsonderlike mens.

Die ligte dieët!

Augustus 17, 2009 in Sonder kategorie

Vandag is een van die take wat ek my seun mee moet help – die opstel van ‘n gesonde spyskaart vir ‘n week.  Ai, jai, jai, jai, jai!

Ek besef toe so met die rondkrap tussen die miljuisende blaaie wat toegewyd is aan die gesond eet konsep, dat mens eintlik stinkryk moet wees om daar die kosse moet eet!  En baie tyd op hande.  Jitte, hoekom het hulle nie sommer pille vir van die goed nie???

Ek het sommer ook geleer van “Angel food.”  Ek het nog altyd gedink dit is die manna van die hemel.  Toe nie hoor!  Dit is daardie oorskietkossies wat jy op jou bord moet los net om te wys jy’s nie heeltemal ‘n vraat nie.  En dis gewoonlik daardie laaste happies wat soos engeltjiepiepe op die tong proe!  Daai “ek eet net agter die lekker aan” happie.  Daai laaste happie wat jy so sluk en dan jou lippe aflek, jou drom bietjie trommel en sug en jouself behaaglik uitstrek.  Dis nou daardie spesiale happie wat jy so half eensaam daar op jou bord moet los.  Sjoe!

Ook gelees van die Calorie Shifting ding.  So shift jy jou kalorieë deur die dag mmmmm amper soos jy van kanaal tot kanaal skuif om die alewige advertensies te mis.  So “trick” jy mos jouself dat jy kwaliteit kyktyd geniet.  Nou met die dieët “trick” jy jou liggaam om te dink jy dieët nie, “meantime back at the ranch” dieët jy so skelmpies sonder dat die rolletjies ‘n benul het dat jy eintlik besig is om van hulle ontslae te raak.  Klink vir my meer na kantoorpolitiek as jy my vra.

Ek het toe ook sommer so per toeval ‘n “No more heartburn” dieët opgespoor.  Ek wonder nou of die ou heeltemal imuun is teen die vreeslike komkommer toebroodjie sooibrand.  Want sien, daardie toebroodjie is deel van die spyskaart.  En glo my, as jy nou sooibrand kry van ‘n komkommer toebroodjie, sal jy met my saamstem dat dit die koning van sooibrandland is!  Dis daai een wat brand so vanuit jou binneste tot by jou keel en opstoot tot dit die trane uit jou oë uit pers.  Daai een wat 6 pakkies Eno’s nie eers in ses ure, wat nog te sê van 6 sekondes, sal kan stuit nie. 

Dan is daar natuurlik die “diet without diet” dieëte.  Daardie wat jy pakke pille, byvoegings, aanvoegings en aarvoedings voor nodig het.  Jy pop die pilletjie en dan eet jy waarvoor jy lus is.  En soos ons maar is, het ons mos nie die fynskrif gelees dat jy ten minste elke dag ‘n paar “contortionist” bewegings moet uithaal en ten minste 30 kilometer moet stap nie.  Anders werk dit nie.  Die redenasie is, jy dieët nie maar jy moet oefen sussie!!!!

Ek verkies natuurlik die ligte dieët.  Die prinsiep is heel eenvoudig … wanneer die ligte aangaan dan eet jy … of so iets.  Baie makliker, veral omdat ek in ‘n huis bly waar daar elke dag ‘n lig MOET brand, maak nie saak of ons soos goeie burgers “energy” wil “save” nie.   En ‘n mens kan tog nie energie bespaar nie, want dit wat jy nie gebruik nie, sit om in vet …. of wat praat ek alles?

Ek wonder telke male

Augustus 13, 2009 in Sonder kategorie


of ek ‘n Spreuke 31 vrou is.  En ek is seker dat jy dit ook al telkemale gedoen het.

Julle kan wel vra hoekom ek nou oor dit wil skryf en die antwoord is eenvoudig.  Ek wil bepaal of ek een is.

Gisteraand besluit ek om daardie gedeelte oor en oor te lees tot dit insink en dames, groot was my verligting toe ek sien dat daar nêrens gepraat word van die ondankbare takies soos skottelgoedwas, stryk en afstof nie.  En as jy my werklik ken, sal jy weet hoe groot daardie verligting regtig is 🙂

Ek besef toe dat elke vrou wat getroud is en werk, werklik ‘n Spreuke 31 vrou is.  Ja, ons is!   Ons is dalk nie die beste huishoudsters nie, maar ons verkoop ons ware, ons hou toesig oor ons huishouding, ons werk hard, koop eiendom en pluk die vrugte van ons harde werk.

So as jy vandag voel dat jy nie ‘n Spreuke 31 vrou is nie, want jou huiswerk kom tweede na jou werk wat die brood huistoe bring.  Wees verseker, jy is ‘n Spreuke 31 vrou.

Jou waarde word nie bereken deur te bepaal hoe netjies jou huis is nie.  Jou waarde word bepaal deur die waarde wat jy toevoeg tot jou huishouding.

En die tuisteskeppers?  Jou waarde word bepaal deurdat jy die huishouding se wiele goed geolie laat loop.

Wat ek eintlik wil sê, is of jy in ‘n beroep staan of nie, jy is ‘n vrou, jy is ‘n wonderlike vrou, jy is ‘n vrou van waarde en jou waarde is veel meer as kosbare edelstene.

Lekker dag vir elke vrou hier in blogland.

Daars n wind wat waai

Augustus 12, 2009 in Sonder kategorie

Man, ek geniet Augustus met sy winde.  Mense kyk my skeef aan as ek so sê, maar ek geniet dit as die wind deur my hare waai en as dit so om die hoeke van die huis loei.

Mens kry ook mense wat onder “winde” hokkies geplaas kan word:

1.  Die windgat

Ons almal ken hierdie mense.  Hulle jaag deur die strate met die selfoon geknyp tussen die oor en skouer.  Dis die mense wat deur die lewe swarrel en mens dink baie keer dat hulle nie ‘n bekommernis van ‘n dag oud het nie.  Maar ek dink daar skuil maar ‘n bietjie onsekerheid agter daardie wintie masker.

2.  Die windmakerige persoon

Ja, met hulle moet mens ook in ons daaglikse bestaan hanteer.  Dit is daardie persoon wat van alles en nog wat beter weet.  Jy kan vir die persoon niks leer of vertel nie.  Want hulle was al daar, het dit al gedoen en tien teen een as wenner uit die stryd getree.

3.  Meer wind as water mense

Hierdie mense beloof die son, maan en sterre maar kan nie deliver nie!

4.  Voet in die wind slaan mense

Hierdie mense kan nie die wind trotseer nie!  Wanneer daar moeilikheid in die pad is, sal hulle eerder omdraai en in die ander rigting hardloop.

So as jy die dag windgat voel en die windmakerige persoon bring winde van verandering en jy weet dat die persoon meer wind as water is, slaan voet in die wind!

Sodoende sal jy nie in ‘n tornado opgesuig word en iewers onbekends en ongewens uitgespoeg word nie.

My eie skrywes

Augustus 10, 2009 in Sonder kategorie

Ek wil net graag mense se aandag daarop vestig dat meeste goed wat ek skryf, my eie pennevrug is.  Daarom sal ek dit waardeer indien jy van my skrywes iewers gebruik, dat jy ‘n verwysingsskakel na my blog sal plaas.

Ek plaas baie keer ‘n skakel op Facebook na nice skrywes wat ek hier ontdek maar sal nooit maak asof dit my eie is nie.

Elke stukkie eie skryfwerk vir elke blogger is soos ‘n baba.  Dis jou eie en die dag as jy agterkom dat jou baba uigegee word as iemand anders se baba, dan maak dit die moederinstink in mens wakker.

Jammer vir die wat nou dink ek is ‘n “pompeous arse”, maar as mens op so-iets afkom, dan is dit onlekker.

Happy blogging.

Dankie vir die privaat boodskap wat ek ontvang het en dat die blog post verwyder is.

My ander blog

Augustus 9, 2009 in Sonder kategorie

Ek het vanaand ‘n blog begin waar ek met julle my 40 dae uitdaging tov my tienerseun gaan deel.  Ek hoop dat julle vir my raad sal gee maar bowenal, dat julle vir sal moed gee as ek moedeloos raak en sal help dat ek hierdie uitdaging deurvoer. 

40 Dae Liefdesuitdaging