Jy blaai in die argief vir 2011 Januarie.

Die hart van Hartman

Januarie 27, 2011 in Sonder kategorie

makeer niks!

Die plaaslike gp het al laasjaar vir Hartman gesê van die stent in die hoofslagaar….oor en oor.  Hy was net nie lus daarvoor nie.  Die pad soontoe, die nag in die hospitaal, die ens ens…was te veel vir hom. Later maak die gp hom lekker bang en maak dringend die afspraak vir Dinsdag…eergister.  Ek reel vir aflos – beplan vir 2 dae vir die aflos en pak 2 dae se klere in…op die ingewing van die oomblik gooi ek nog ‘n eksta stel klere in vir in case ek nie lus is vir wat ek ingepak het nie. Dankie tog!  So, Dinsdag was dit ‘n hele spul toetse. van halftien af tot 6u wat ek daar weg is.  Hartman se bek was lekker dik oor hy in die hospitaal moes oornag – hy moes, anders betaal die mediese fonds nie uit nie, sê hulle.  Woensdag half nege is hy teater toe, teen half tien kom hy uit.  Sy are is oop.  Niks van stente nie.  Hy moet net lê tot half twaalf toe, dan kan hy opstaan.  Ok, 12u se ek vir die “desk” ons kan seker nou huistoe gaan.  Ja, dis ok, net die dr se toestemming dan is ons weg…….glo my….half 7 kom die dr hom ontslaan. Te laat! Ouma Loua kan nie oor berg en dal in die nag nie.  Bel die hoof. Ek kan NIE in die nag sien nie.  Kan nie afstand skat nie, kan nie bepaal hoe ver die ligte voor my is nie….ek is te oud vir die stres ook.  Hoof se ek moet ontspan en alles is gereel vir die aflos.

 

Slaap toe maar weer in die gastehuis.  Hartman se enigste stel klere mooi met die hand oopgestryk – (hy moes dit vir drie dae dra)  Het mos nie geweet nie.  Anyway, ons is tuis en Hartman se bene pyn alweer…so die probleem le seker in die rug, al wys die plate niks. Sal maar moet sien wat die toekoms inhou.  Hy het van ‘n 34 broek geval tot ‘n 28 wat nou soos ‘n sak om sy boudjies hang. Sy volgende aankope sal seker by Mr Price se kinderafdeling moet wees.

 

Baie dankbaar vir julle ondersteuning.

 

Met baie liefde

Loua.

 

Ouma kon darem vir die kleinseun Ezra ‘n rugsakkie koop. Het drie boekies daarin gesit.  Hy is so oulik met die sakkie op sy rug.  Ek dink hy slaap nou daarmee….

LOU – vir Murphy

Januarie 24, 2011 in Sonder kategorie

Toe ek begin blog het, was daar verskillende Lo’s wat reeds geneem is, soos Lu en Lulu ens

 

My naam is mos net eenvoudig Louise.

 

Van my pelle noem my Loo – as ek met my blogpelle praat noem hulle my Lou soos in nie warm of koud nie.

 

 

 

Anyway, ons ry more oggend Kaap toe.

Hospitaal toe met Hartman..

Hoop hulle kan net ‘n stent deur die are kry, asseblieftoggies!

 

Sien julle as ons terugkom, dalkies sommer Donderdag as julle diep aan ons dink.

 

😀

Vertigo

Januarie 22, 2011 in Sonder kategorie

Dis ‘n siekte.

 

Ek kry dit somtyds.

 

Die gp sê dis wanneer die vog in die middelore nie dieselfde digtheid het nie.

 

Dan sien jou een oog ‘n fraksie van ‘n sekonde later wat die ander een sien.

 

DAN IS JY SOMMER GOEDKOOP DRONK

 

Loop en val.

 

Nare besigheid.

 

Daar’s pille voor.

 

Die pille maak my net erger dronk.

 

Vertigo = jy kan NIE vertikaal wees nie, dan val jy om.

 

Die eerste keer was in ‘n Junie-vakansie – toe bly ek vir 5 dae op die bed.

 

Nou kry ek dit meestal as dit so warm is.

 

So, as julle my iewers sien strompel en dis voor 7u saans, dan is dit nie die wynboere se baie wit en stofpiepie droog nie.

 

En, nee, ek het nie ‘n half jack in my sak nie!

 

😀

 

Môre sal dit beter gaan – ek weet!

 

 

 

 

Is dit nie ‘n geluk nie?

Januarie 20, 2011 in Sonder kategorie

Een van die leesboekies wat die kleintjies in Gr 3 moet lees is “Gelukkige Giel”

 

Kortkliks:

 

Giel is klaar met skool, groet sy ma en gaan soek rykdom. 

Kry ‘n werk en kort voor lank verlang hy na sy ma.

 

Vat sy geld en begin die lang pad huistoe om vir sy ma die geld te gee.

Langs die pad kry hy ‘n boer op ‘n trekker. Hy is moeg geloop.

Hy koop die trekker.

 

Is dit nie ‘n geluk nie?

 

Trekker gaan staan sonder brandstof.

Daar kom ‘n man op ‘n fiets aan.

Ruil die trekker vir die fiets.

Fietse gebruik nie brandstof nie

 

Is dit nie ‘n geluk nie?

 

Nie lank nie, of die fiets het ‘n pap wiel.

‘n Meisie met ‘n gans onder die arm bied aan om die gans vir die fiets te ruil.

Nou kan hy die gans vir sy ma neem om gaar te maak.

 

Is dit nie ‘n geluk nie?

 

Op sy pad kry hy ‘n man met ‘n slypsteen.

Hy ruil die gans vir die slypsteen, want hy sal baie geld daarmee kan maak.

 

Maar die pad is lank en warm en die slypsteen is swaar.

Hy kom op ‘n vars stroompie water af en buk om daarvan te drink.

Die slypsteen val in die water

 

Giel spring op en lag van blydskap.

Nou het hy niks meer om te dra nie.

 

Is dit nie ‘n geluk nie!

 

Hy hardloop huistoe om vir sy ma van sy geluk te vertel.

 

Die rede hoekom die storie so kosbaar vir my is:

 

12  jaar gelede was daar ‘n baie slim tweeling in my klas.

Ek moes siekverlof neem vir ‘n operasie.

Toe ek terug in die skool is, het elkeen in die klas vir Juffrou ‘n kaartjie gemaak.

Een van die tweeling se woorde op die kaartjie was:

 

Juffrou het nou nie meer …..nie.

Maar Juffrou kan nog praat!

Is dit nie ‘n geluk nie!

 

 

 

 

 

 

Eerste dag

Januarie 17, 2011 in Sonder kategorie

Net gou verslag lewer.

 

Deurmekaar – soos verwag.

 

Eerste skooldag.  Die Gr1’s se gehuil en geskree het deur die gange ge eko.

 

Het 32  Gr 3’s in my klas.  Die meeste van 1989 af.  Sal die besigheid vierkantig in die oe kyk en doen wat die hand goed vind om te doen.

 

 

 

 

Ek het vanmiddag vir kleine Ezra opgepas van half vier af.  Buurman Jan het met sy trekker die land bokant ons huis geploeg.  Ezra het doodstil op my skoot op die sementpaadjie gesit  vir die groot blou trekker gewaai.  Daarna het hy sy kunswerk wat hy gister op die muur begin het, voltooi.  Hy aard na sy ouma sien ek.  Die dag wat ek weet hoe om hom aan die slaap te kry, sal ek aftree en hom voltyds oppas….hy kan al die “a” herken en se dit as ek die flashcard ophou…wens MaanKind kon dit sien…tsk….ai…

 

Dis vrek warm, maar dit gaan baie goed.

 

Dankie

 

 

 

Sondag oordenking..

Januarie 16, 2011 in Sonder kategorie

My ma suffer mos van kolonkanker.

 

Sy het geen pyn nie, maar kry so twee keer per week “aanvalle” van naar ens.

 

Dan smaak dit my sy gaan dit nie maak nie, maar as dit oor is, (so 20min) dan is sy weer ok.

 

Gisteraand bel ek haar en sy sê sy het sopas weer ‘n aanval gehad.

 

Haar woorde was:

 

“I just praise the Good Lord that He gave me the strength to handle it”

 

Geen vrae soos “Why me Lord?”

 

Ma, jy is yster!

 

 

 

 

BESTE VERSKONING

Januarie 15, 2011 in Sonder kategorie

So pas oor die nuus gehoor:

 

‘n Skoolhoof met baie swak matriekuitslae sê:

 

Die swak uitslae is toe te skryf aan heksery

 

Dalk is dit waar.

Dis nie in my verwysingsraamwerk nie.

ok, ek gaan nou ophou lag.

 

VERGADERING

Januarie 13, 2011 in Sonder kategorie

Nuwe dagboek ingewy

Wou so graag daarin geskryf het,

maar daar was niks, toe krap ek sommer

(Enige sielkundige hier rond om my prentjie te analiseer?)

 

BALLET – VIR PRUIMTWAK

Januarie 11, 2011 in Sonder kategorie

‘n Geskenk van gaste wat hier oorgebly het net voor Kersfees.

 

Hulle weet beslis wat my smaak is.

 

Sy is nog nie op haar regte plekkie nie en moes haar mooi balanseer vir die foto.

 

21 cm en baie swaar…

 

Twakman, daar’s niks mooier as ballet nie!

Vergeet van Louis XIV.

 

 

Verder begin my 2011 môre – ons skop die jaar af met ‘n opleidingskursus vir die nuwe CAPS.

Donderdag en Vrydag skool net vir die onnies en vlg Maandag 31 nuwe gesiggies, emosies, agtergronde, IK’s en aanpassings vir die kleintjies en die juffrou.

 

Dan, as ons weer sien is die jaar oor en uit!

 

Koebaai, vrinne.

 

Selfmoord

Januarie 10, 2011 in Sonder kategorie

Die skok het my siel in stukkies geruk – ek moes stilstaan, daar was nie sitplek toe ek die nuus gehoor het nie, en wag tot my siel die skok absorbeer en weer soos ‘n legkaart bymekaarkom.

 

 

‘n Vriendin se man.

 

Net sy en hy – die kinders is al uit die huis.

 

Lieflike huis, lieflike vrou, lieflike kinders.

 

Geen teken vooraf.

 

Sy huil nie.

 

Sy is net baie baie baie kwaad vir hom.

 

As alles oor en uit is sal sy seker.

 

Ek wonder wat gebeur met/in so ‘n mens se kop.

Dis vooraf beplan.

Die bewyse is daar.

Vandag sou die oestyd vir hom begin.

Was hy net nie meer lus nie?

Gesond en welgesteld, bemind en baie bekend.

 

Sal ons ooit weet wat in ons medemens se kop aangaan?