Jy blaai in die argief vir 2008 September.

oor dis oor en verby

September 28, 2008 in Sonder kategorie

Ok, dis toe verby!

Die saal was vol, die musiek was  “Christo en Kobus” live.

Het nie eers geweet wie hulle is nie, maar die mense het heeltyd gedans, so hulle was seker goed….en glad nie sleg om na te kyk nie!

Vandag het ons die dogter se verjaarsdag gevier….10 mense om die tafel.  Sy en die engelsman het al die kos gemaak en dit was hopeloos te lekker.

More gaan ons die stoor opruim. Al die tafels en stoele en borde ens SKOON teruggee en dan begin die vakansie.

Gaan bietjie Worcester toe om vir Ouma te kuier, dan nog ‘n naweek oor vir voorbereiding….en dan begin dit weer van voor af!

oor moreaand se dans

September 26, 2008 in Sonder kategorie

 Hello aan julle wat hier lees – julle weet nou al wat more vir ons voorle.
 
Dis mos nou die dans met die 300 gaste wat ons moet vermaak en voer.

Vanoggend staan ek en die juffrou wat die kosbesigheid beheer by die teetafel in die personeelkamer. Sy se saggies vir my: Weet jy, dis die laaste dag van die kwartaal…….en dit voel vir my soos die OORDEELSDAG.

Ek wou eers in trane uitbars, maar toe oorweldig die behoefte om te lag my…..ek kon net nie ophou nie!

Ek se toe: dis al wat ons uit hierdie panarie kan help!

Die kinders by die skool is toe 11uur weg en ons almal is stoor toe waar die besigheid plaasvind.  Toe ons die deure oopmaak, stroom die water in.  Die modder en plasse water is van deurnag se reen se skuld.  Die moerse deure is oop en die wind waai die tafeldoeke buite beheer.
Ek het heelmiddag die messe en vurke gewas en opgevryf, en in servette toegedraai en moreoggend is dit tafels dek en was en vee……hoop net ons kan die modder soort van uit die stoor kry.

As ek nou ‘n regte Namakwalander was sou ek dit in beter en keuriger taal kon beskryf.

Hou maar duimvas…die weervoorspelling se darem dat dit nie more sal reen nie.

Hoop julle het ‘n BAIE beter naweek as ek!

oor ouma word….of nie

September 24, 2008 in Sonder kategorie

Ek het sopas Poppie met Pakkie se skrywe gelees, en lowercase v se kommentaar….toe wonder ek oor kinders kry.

My dogter, 29, 5 jaar getroud, het my nog nie ouma gemaak nie..nie omdat sy nie kan nie….omdat sy nie wil nie!

EN SY DRING DAAROP AAN DAT EK HAAR ANTI-OUMA PILLE MOET VOER

Sy en die engelsman is ook ons bure en beste vriende. Klink lekker ne?   Is lekker! 
Anyway, ek wou ook nooit kinders gehad het nie. Was ook 5 jaar getroud toe Grumpy vra of ek ooit planne het vir ‘n groter familie. Hy’t my so bietjie skrikgemaak, ek gryp toe die almanak en werk presies uit wanneer die eerste een gebore moet word,  (daar was toe nog nie so iets soos kraamverlof in die onderwys nie, net langverlof, 12 dae per jaar)

Die tweede en laaste kind, ‘n seun, is toe so 5 jaar later….op Grumpy en Sussie se aandrang, gebore.

Terug by Suster: Sy se sy kyk so om haar rond en sien almal met kinders, dan dink sy dis so weird dat mense kinders het. Sy kan haarself nie in die rol sien nie.

Kyk, mense, ek se maar niks, ek moedig nie aan nie, en ontmoedig ook nie….wil nou nie dat dit my skuld moet wees oor whatever gaan gebeur nie.

As ek dink aan die vreugde wat my twee gee, begeer ek dat sy dit ook sal ervaar….en as sy die dag een het, mag dit ‘n dogter soos sy wees!

oor nog ‘n fondsinsameling

September 22, 2008 in Sonder kategorie

 Daar le ‘n harde week voor vir ons 7 onnies – 2 dames, 3 mans en nog 2 dames met beheerliggaamposte.

Die Sakekamer van ons dorp hou jaarliks ‘n Eldorado rally.  Die fondse word dan tussen ons dorp se 3 skole verdeel.  Elke tweede jaar is dit ons skool se beurt om die dans en ete te hou.

Driehonderd gaste vir die dans, 30 tafels, 300 stoele, alle eetgerei en glase, alle voorgeregte, hoofgereg, nagereg ens.
Die stoor waarin die dans gehou word is ‘n ent uit die dorp. Daar is nie ‘n kombuis nie, so die vuil skottelgoed sal ons maar in kratte pak en tuis kom was.

Die kaartjies is nie goedkoop nie en die stoor moet stunning opgemaak word. Dis lyste en lyste, en vergaderings en beplanning. Gelukkig is Woensdag mos ‘n vakansiedag, so ons sal dan die vooraf ryery en aflaaiery doen.  Die skole sluit Vrydag. Die rappote, skedules en registers moet afgehandel word. en Maandag is dit dan die GROOT opruim!

Dan is daar 4 dae plus die naweek oor vir vakansie. Beplanning word dan gedoen vir die laaste kwartaal.

Ons is dankbaar vir die geleentheid. Die fondse gee vir ons skool gewoonlik ‘n lekker hupstootjie.

Kan julle al begin verstaan hoekom ek smag na aftrede oor 3 jaar? Ek voel te oud vir al die dinge (sug)

Anyway, mag julle ‘n lekker RUSTIGE week beleef!!

oor die grotman

September 21, 2008 in Sonder kategorie

My opinie:

Ja, dit was snaaks.  Het later net gesmaail toe ek voel ek raak nou siek van die lag.

Die punt is eintlik dat teen die prys, R180 pp, dit ook  huweliksberading en sielkundige berading insluit.

Amper verstaan ek nou die hoe mans se koppe werk.

Alles ingesluit by die prys….’n bargain sou ek se.

Lekker rustige Sondag vir julle.

Pst: julle daar in die noorde, ek dink julle gaan reen kry.  Die boere hier se  as die oostewind so warm waai, dan is dit julle beurt.

oor grotman

September 18, 2008 in Sonder kategorie

Die Grotman kom Saterdag hier na ons klein, klein dorpie.

Kan julle dit nou glo?
Dis ten bate van ons skool en ons hoop vir ‘n GROOT wins…let wel HOOP!

Snaaks hoe ons werk vir fondse om die plek waar ons werk te laat werk!

Dis te danke aan wonderlike ouers wat ons nood raaksien.

Baie dankie aan die ouers wat saamstaan.

oor evil

September 17, 2008 in Sonder kategorie

Next time evil reminds u of your past……….
remind him of his future!

So kom die evil gees mos my huis in.
Ek kon hom so lekker kry met die woorde.

Gebruik!

oor karakterbou

September 16, 2008 in Sonder kategorie

Vroeg in die jaar was daar dinamiese, positiewe sprekers om ons personeel op te lei vir die 6 pilare van karakterbou.
Van die skole in die Wes-Kaap implementeer dit tans.

Kortliks die 6 pilare en hoe dit werk
1. Betroubare persoon
2. Respekvolle persoon
3. Verantwoordelike persoon
4. Regverdige persoon
5.’n Persoon wat omgee
6. ‘n Goeie burger
Die gemeenskap van Vredendal het selfs werklike pilare voor die biblioteek geplant.

Ek bepreek kortliks die eerste pilaar.

1. ‘n Betroubare Persoon:
        het integriteit
        is eerlik en lojaal
        steel of jok nie
        bou ‘n goeie naam
        kan vertrou word
        doen die regte ding
Die eerste pilaar is bekendgestel aan die kinders en daagliks word daarna verwys.  As ‘n leerder dus iets verkeerd doen, moet hy stop en dink, die lysie deurgaan en self se wat hy verkeerd gedoen het.  Dit werk sowaar!  My leerders erken dadelik en vra omverskoning. 

Daar was ‘n samekoms vir ouers en hulle is ook daaraan bekendgestel. So kan ons saamwerk aan die opbouing van die karakter…vir opvoeders, ouers en kinders.

Plase is besoek en ouers is daar toegespreek. Een groot plaasgemeenskap hier naby, in samewerking met die polisie, het dit verder geneem.  Hulle hou gereeld optogte met trompoppies en orkes.  ‘n Vreeslike joligheid!

Die karakterbou program het ontstaan nadat ‘n seun sy maatjie hier naby met ‘n byl doodgemaak het. 

Dit sal sowat ‘n jaar neem om deur die pilare te werk en ons hoop is dat ieder en elke kind en ouer bewus sal wees van wat aanvaarbaar en reg is.

Ek het self ‘n paar lesse hieruit geleer.
 

oor vandag

September 11, 2008 in Sonder kategorie

Hierdie wens vir vandag is vir alle bedrywige bloggers:

May forces of evil
become confused
on way to
your house

Lekker veilige 9/11