by

Die Kaapstad-stadion in perspektief

Desember 13, 2009 in Sonder kategorie

Gerrit Brand het ’n paar mense gevra om hulle idees oor die nuwe Kaapstad-stadion te gee. Lees gerus wat hulle sê: Kliek hier.

Ek het hierdie foto Vrydagaand van Tafelberg af geneem. Dit plaas die stadion in ’n sekere perspektief. Daarom wil ek my bydrae ook maak tot Gerrit se debat:

Kom ons begin vir ’n oomblik by die positiewe, voor ons die hartseersnare tokkel.

1. Suid-Afrika het bewys ons kan meeding met China en binne ’n oogwink stadia bou wat wêreldklas is. Ek ken ’n hele aantal ingenieurs en kontrakteurs wat betrokke was by die bou van die stadion en hulle is – met reg – trots op hulle werk. (Ek noem China, want hulle is besig om op groot skaal hulle dienste aan die res van die wêreld te adverteer.)

2. Ons het bewys dat ons op datum kan lewer. Waar is al daardie doemprofete wat sê Afrika kan nie tyd hou nie?

3. Ons het die infrastruktuur. Weet julle hoe groot van die hyskrane is wat gebruik is vir die bou van die stadion? Iets soos die 800-t Demag CC 2600 rusperhyskraan word deur ’n hele vloot vragmotors van punt na punt vervoer.

4. Ons het ons ekonomie ’n hengse hupstoot gegee. Die regering bly die grootste bydraer tot ons land se ekonomie. Het julle gesien Suid-Afrika is nie meer in ’n resessie nie? Dis grootliks te danke aan enorme regeringspandering op hierdie soort projekte in ’n tyd toe alle ander lande se ekonomieë ernstig geduik het. Dis ons belastinggeld wat vir daardie stadion betaal het – dis dus ons geld wat weer in die ekonomie terug geploeg is.

5. Die argitektuur is heel skaflik. Ons kon ’n tweede Voortrekkermonument gekry het.

Daar is egter ook negatiewe goed.

1. Hulle het ’n pragtige atletiekstadion en fietsrybaan moer toe gestuur – en die nuwe stadion is te klein vir sulke geleenthede. Dit is ’n baie klein stadion, slegs 68 000 sitplekke, met ’n bitter klein speelveld. Behalwe vir sokker, rugby en popkonserte is dit nutteloos.

2. Dis stadion moes in Athlone gewees het. Dis ’n baie arm buurt wat sou kon doen met ’n biljoen. Daar staan reeds ’n stadion, dit sou baie beter wees om daardie stadion op te gradeer en die sokker te laat plaasvind in die hartjie van ’n sokkermalomgewing. (Die De Vriese het baie lank in Crawford gebly, ’n klipgooi van die Athlone-stadion af. Ons weet hoe mense uitgesien het na die koms van die wêreldbeker – en nou sit hulle steeds droëbek.)

3. Een van die ingenieurs wat die nuwe stadion gebou het, sê koste per sitplek (uitgewerk oor die duur van die wêreldbeker heen) is meer as ’n miljoen rand. Jip. Meer as R1-miljoen vir elke keer wat iemand gaan sit (en dis as elke liewe sitplek uitverkoop is.)

4. Al daardie ligte kos geld. Waar is die sonpanele en windlaaiers om dit te dryf?

5. Vier biljoen rand kon baie ander projekte befonds het – wat ook die ekonomie kon help.

Wat dink julle?

9 antwoorde op Die Kaapstad-stadion in perspektief

  1. Pragtige foto en goed gesê!

  2. Izakdv het gesê op Desember 13, 2009

    Dankie!

  3. Izakdv het gesê op Desember 13, 2009

    Jip, kon ‘n paar sakkie mieliemeel met daardie geld koop!

  4. Hier in Angola bou die Chinese ook nou sokker stadions en om eerlik te wees, die pas wat hulle handhaaf en wat in RSA gehandhaaf word, is omtrent dieselfde. In konstruksie is sekere dinge maar net vasgesteldes, goed moet droog word en sens, maar ja, ek is verbaas oor die stadions in RSA en nog meer dat daar so min stakings tydens die bouery was.

    Of dit geldmors was, dink ek ja dit was. Dit het baie werk verskaf, maar vir ‘n baie kort rukkie en of die investment ooit terug betaal kan word? Ek dink nie so met die huidige ekonomiese klimaat nie. Ons het net te vel ander dinge wat geld nodig het, eerder as stadions.

  5. Hehehehe oor die Voortrekkermonument. Ek is nie eens baie afrikaans nie, maar ek dink die Voortrekkermonument is nogal cool…dis maar net, soos die stadion, nog ‘n monument vir die mens om vir homself te wys, “Kyk, ons HET en ons KAN, en f*k die res!”

  6. Izakdv het gesê op Desember 25, 2009

    Jou laaste punt is iets waaroor ek ook tob

  7. Izakdv het gesê op Desember 25, 2009

    Ek wonder ook oor jou laaste punt

  8. Izakdv het gesê op Desember 25, 2009

    Ek sien ook uit na die sokker

  9. Izakdv het gesê op Desember 25, 2009

    Cool. Ek’s bly jy hou van die Voortrekkermonument, ek vind dit ‘n bietjie koud …

Laat 'n Antwoord

Jou e-posadres sal nie gepubliseer word nie.