Teologiese kritiek op my artikel in BY

Oktober 25, 2009 in Sonder kategorie

Prof. Hennie Stander, ‘n teologie professor aan die UP is iemand wat ek as ‘n goeie vriend en mentor beskou. Hennie is ook wyd bekend as skrywer van inspirerende Christen-boeke. Hy is baie ontsteld oor my artikel in BY. Ek plaas graag sy brief aan my, met my kommentaar onderaan.

Liewe Ilse, jy weet dat ek altyd van jou skryfwerk hou, maar in hierdie artikel het jy die Bybel gruwellooslik verkeerd aangehaal. Jy skryf: “God sê ook (deur Paulus, dink ek) dat ons alle dinge moet beproef, maar die goeie moet behou. Wat by implikasie sê dat ons wel soms gaan afdwaal.”

As jy die vers naslaan in die Bybel, sal jy sien dat dit hier hoegenaamd nie gaan om “afdwaal van God af” nie.  Hierdie vers kom uit 1 Tes. 5:21 en sê: “Beproef alle dinge, maar behou die goeie.” Die vorige vers sê duidelik dat hierdie uitspraak handel oor profesieë (= boodskappe van God): Daar was mense wat profesieë  uitgespreek het. Sommige van hierdie profesieë (boodskappe) was vals, en ander was waar. Daarom sê Paulus dat ons altyd die profesieë moet toets (of beproef), en dan voeg hy by dat ons natuurlik die goeie profesieë moet behou.

In die daaropvolgende vers voeg Paulus ook nog by dat “’n mens jou van elke vorm van kwaad moet onthou.” Nou hoe op dees aarde kan enigiemand op grond van hierdie teks sê dat dit impliseer “dat ons wel soms gaan afdwaal”. Hierdie vers vra juis dat ons van die kwaad af moet wegbly!

Die bedoeling met Paulus se woorde dat ons die profesieë (= God se boodskappe) moet beproef, is nie om te sê dat God verkeerde boodskappe kan gee nie, maar wel dat mense kan voorgee dat ’n bepaalde boodskap van God kom, terwyl dit dalk nie die geval is nie. Ons mag sulke boodskappe nie sonder meer aanvaar nie, maar moet dit eers beproef (= toets).  Voorts, ook die opdrag om “die goeie te behou” en “om jou van elke vorm van kwaad te onthou”, verwys waarskynlik nie na “goeie” en “slegte” dinge in die algemeen nie, maar spesifiek na “goeie” en “slegte” boodskappe. Bogenoemde verse gee dus nie die groen lig vir enigiemand om met die sonde te heul nie. 

Vergeef my dat ek so drasties reageer, maar ek het geskrik toe ek gesien het hoe jy hierdie vers in jou artikel aanwend. Maar ek het die res van jou artikel geniet, soos ek ook nog altyd jou ander skrywes geniet. Baie geluk ook met die HB Thom-prys wat jy beslis verdien. Hennie Stander

Die stukkie waaroor dit gaan in konteks aangehaal:

Ek kan nie eintlik Bybelverse aan nie, maar ek weet Jesus het op aarde sonder huiwering gemeng met prostitute, tollenaars, heidene en Samaritane. En dat Sy hele wet opgesom word in hierdie woorde: jy moet God én jou naaste liefhê soos jouself. God sê ook (deur Paulus, dink ek) dat ons alle dinge moet beproef, maar die goeie moet behou. Wat per implikasie sê dat ons wel soms gaan afdwaal.   

Dankie Hennie, soos altyd waardeer ek die kommentaar.

 

Ek dink net jy het my bedoeling verkeerd verstaan. Ek se nie ons MOET afdwaal nie, bloot dat Jesus seker daarvoor begrip het dat ons mense is en daarom (noodwendig, vanwee ons swakheid) sal afdwaal.

Lees dit in die konteks van almal is feilbaar, ook en selfs Christene. Ons word kwaad, ons sondig. Maar ons moet egter altyd probeer om die goeie te behou.

 

Wat ek eintlik probeer se, is dat nie een van ons kan spog dat ons nog nooit afgedwaal het nie. En dat ons daarom nog harder moet probeer om die goeie te behou. (Dus, moenie vir Casper of George vloek nie – probeer net harder om jou eie lewe goed en reg te hou.

 

Groete,

ilse

 

4 antwoorde op Teologiese kritiek op my artikel in BY

  1. Hi Ilse, Natuurlik stem ek saam daarmee dat ons almal feilbaar is, ook Christene. Waarom anders dat ek elke dag verleë voor God staan?! Maar 1 Tes 5 kan nie eens naastenby daarmee in verband gebring word nie. Ook dit wat jy in jou reaksie hieronder sê, nl. “dat ons die goeie moet behou”, het absoluut niks te doen met “kies tog op die ou einde die mooi dinge in die lewe nie”. Daardie vers gaan daaroor dat ons moet onderskei tussen valse en ware boodskappe, dat ons moet sensitief wees om te kan sif tussen sin en onsin, dus: dat ons ‘n “onsin detector” moet hê sodat ons kan weet watter boodskappe is vals en nie van God af nie, en wat is waar en kom wel van God af.

    Jy kan sê ek het jou bedoeling verkeerd verstaan, maar gaan lees maar weer jou eie artikel. Jy gebruik daardie vers asof dit nou maar ‘n noodwendigheid is dat ons een of ander tyd wel gaan afdwaal en die verkeerde gaan doen. So ons moet dit maar aanvaar, en net probeer om op die ou einde darem die regte goed te behou. En dit is nie wat hierdie gedeelte wil sê nie.

    Maar ek bly vir jou lief, en jy bly vir my ‘n gunsteling joernalis, en ek sal steeds jou artikels lees omdat jy so lekker en aktueel skryf.

    Jou broer in XTus, hennie

  2. Dankie Hennie! Liefde word waardeer. Jy kon netsowel die uitkryt-roete gegaan het. Ek weet egter dat ek nie bedoel het wat jy daarin lees nie. Let’s agree to disagree.

  3. Hi Penkop. Ja, ek verstaan die vers ook nou in die regte konteks. Maar jy’s reg oor my bedoeling – ons almal fouteer en dwaal, want ons is mense. En dis maar moeilik om altyd die regte ding te doen.

  4. Dankie Tannemys! Ek stem saam met jou! Mooi week vol vreuge en vrede vir jou! Hennie

Laat 'n Antwoord

Jou e-posadres sal nie gepubliseer word nie. Vereiste velde word aangedui as *.