by

BRIEF NEGENTIEN: BABELSE WINDEIER EN ANDER HOOGTEPUNTE (1)

Augustus 31, 2009 in Sonder kategorie

From: “johannes lochner<[email protected]>

To:       [email protected]

Subject:           BABELSE WINDEIER EN ANDER HOOGTEPUNTE

Date sent:        Monday, 25 June 2001 11:43:37

Liewe verre familie en vriende

Anyong haseyo! Anjeseyo! Obso?

Wel, as julle g’n toet of blaas verstaan nie, dan verstaan julle nou hoe ek soms in die babelse verwarring van meertaligheid en geentaligheid voel. Die meeste van die tyd is dit op ‘n amusante manier bevrydend om nie-talig te kommunikeer, want dit dwing jou tot die essensiële van dinge. Dan is daar net soms hierdie volmaan, hormoonwanbalansdae wat gebare en intuïsie en snuif met oopgesperde neusvleuels en trillende voelend met vibrerende snorbaarde in die energielaaiende atmosfeer van vreemde, ongeïnterpreteerde woorde, effe kortskiet.

Al wat dán tot my sieleredding kom, is om die obskuriteit van dit alles blootvoets in die oog te kyk en uit die punt van my hart my halfpap en slap te lag.

Só besluit ek en Pieter die ouere om die naweek buite die grense van Seoul te gaan ontgin. Pieter lees iewers van ‘n stad wat as die pottebakkeryhoofstad bekend staan – en, gevoelig vir die skone in die lewe, voel hy die belusting om die potjies en bakkies en ander ware van gekleide huis en haard te gaan besigtig.  Hy vra of ek nie wil saamkarwei nie, en die gipsy in my klap hande en ek vra vir Sok Jin watter busstop en hoe en waar en Saterdagmôre is ek en Pieter in ons twee aparte huise met hoenderhanekraai douvoordag soos twee ou Namakwalandse boere op en wakker en reg vir die rit.

Ek was nog sommer wasgoed voor ek vir my mooimaak en vee die vloer en net vordat ek nog skaap wil slag en brood wil insuur, lui die telefoon en Pieter sê: waar’s jy? Ons ontmoet voor die gebou waar ons werk en neem ‘n bus Techno Mart toe. Voor Techno Mart aangekom, loop ons kruis en dwarsoor die hoofpad op soek na een van Seoul se vier hoofbusterminusse. Pieter por my aan om die kaartjies te gaan koop, want sy draad is kort wanneer dit by gebrek aan taligheid kom.

Laat 'n Antwoord

Jou e-posadres sal nie gepubliseer word nie. Vereiste velde word aangedui as *.