by

BRIEF AGTIEN VEELS GELUK LIEWE JOHANNES 1

Augustus 29, 2009 in Sonder kategorie

From: “johannes lochner<[email protected]>

To:       [email protected]

Subject:           My verjaardag

Date sent:        25 June 2001

10 Junie 2001

Liewe kosmiese familie

Vandag was my eerste tropiese, warm en humiede verjaardag vandat ek in die middel van die winter op ‘n reënerige oggend in Vredendal gebore is. Verlede jaar het die reën so mildelik op my stukkie verjaardagaarde neergeval toe my gaste opdaag, dat ons almal se ontwerpersklere eers oor ‘n stoel moes hang om droog te drup en net dié met waterdigte grimering kon met vlekkelose gelaat die res van die partytjie geniet.

Gisteroggend het een van my kollegas, Pieter die ouere, vir my ‘n verjaardagontbyt gegee.

Dit was op velerlei gebiede ook ‘n eerste vir my.

Eerstens het ek toegelaat dat iemand anders my vermaak, waar ek gewoonlik met vorige verjaardae so woes kook en skrop en skuur, dat ek nog met die stortkep op my kop die kombuisvloer was wanneer die eerste gaste opdaag.

(Dis nou behalwe die keer in die geel huis in Observatory to my vriendin, Colette, al haar Kook en Geniet-briljanthede uitruk en berge en borde en skinborde vol kos uit die prettigste en pragtigste kamers van haar hart uit opdiep, wat ‘n hele leërskaar van Jong Dames Dinamiek dames groen van jaloesie sou laat word.

Of dis nou ook behalwe die keer wat my Franse vriendin, Laure, my uit die huis jaag en my mure met dosyne rooi rose, in die vorm van harte, versier.

En ja, dis nou behalwe die keer wat Rebeka ‘n koek uit haar kamer gaan opdiep, wat besig was om te smelt onder die aandag van al die dertig of meer kerse.

En dis beslis behalwe die keer toe my twee sustersvriendinne, Marianne en Stehanie, vanaf die ander kant van die wêreld tot in die Paarl kom ry, om my verjaardag saam met my te vier, nadat ek my sonder huis of haard, pas geskei van die skoot en arms en hart van Johannesburg, bevind het).

Maar vir die res van my verjaardae was ek beslis aan die skrop en skuur en huppel en pronk en prut van die plesier van dinge.

Wat ook onomwonde ‘n eerste ervaring vir my verjaardagontbyt was – en in dié geval het dit geen byskrifte, naskrywes, stories of stertjies nie – is dat al my gaste gister van die manlike geslag was. Ek neem aan dis ‘n kompliment aan Koreaanse mans. Hie hie hie.

Daar sit Johannes en sy feesvierende Koreaanse maffioso om Pieter se houttafe en verslind lae blaarslaaie, bloedrooi blosende kersietamaties, ingevoerde boepensvet swart druiwekorrels en suikersoet skywe piesang met gebraaide rys gemeng met okkerneute en bruin blokkies uie.

Die manne het een of ander vleisdingetjie wat die rondte doen en ter nagereg sirkuleer ek die gilly bars wat Colette vir my van Suid-Afrika aangestuur het.

Ons drink ‘n heildronk met lemoensap en water.

Op die tafel brand kerse van vanilla en peperment. En Chopin speel op twee klaviere.

Gisteraand kom lees ek my verjaardagboodskappe.

En iewers kom ‘n mooi en medemenslike eenvoudige, sterk en brose hartseer in en uit my op. Dankie, Stephanie, vir jou vry galloppende vers. Dankie, Marida, vir jou familieboodskappe van toegeneentheid en liefde. Dankie, ma en pa, vir my verjaardagete wat ons saam in die gees kan geniet. Dankie, Colette, vir jou koek-en-muis kaart. Dankie, Sanet.

En dankie, ma, verjaardagoproep later, vir die lysie gelukwensinge. Dankie, Rebekah, vir die kopstimulerende kaartjie vir die gemini-energie en dankie, Estelle, vir gelukwensing uit Londen en dat jy my nooi om te kom kuier. Dankie, Irize, vir die verjaardaggeskenk van jou vrugbare, geseënde geheim met my deel.

Dankie.

Dankie.

Dankie.

Laat 'n Antwoord

Jou e-posadres sal nie gepubliseer word nie. Vereiste velde word aangedui as *.