CM

Wie ook al oortuig is dat die waarheid hom vry maak, behoort darem seker te maak dat hy weet wat dit is.

Woorde is glibberig. Die een se feit is ‘n ander se fiksie. Almal gebruik ook nie dieselfde woordeboeke nie.

Wysgere weier al vir eeue om te erken dat dooies dood is.

Aan diegene wat kan is dit lankal bekend dat net ‘n lewendige brein kan dink. Vir ander bly die lewe ‘n knaende geworstel om sin in die niks van dood te vind.

Dit is met trots dat die mens kan weet dat sy regstelsel en natuurwetenskap op feite gegrondves is.

Dit verg meer as ‘n leeftyd om ‘n verstand van die gewaande goedheid van opvoeders te bevry.

Daar is min mense wat wil weet dat hulle nie bedremmeld smartlik gebonde is aan die onkunde van primitiewe voorgangers soos daar van geslag tot geslag deur opvoeders oorgedra word nie.

Behalwe vir die onsin wat kwansuis met woorde gemaak word, is daar geen wonderwerke nie. Ten spyte van sy versinsels is die mens gebonde aan die dinge van ‘n soogdier.

Liggelowigheid is die gevolg van ‘n gebrek aan kennis.