CM

Met so min wat bewese feite glo,  is daar maar baie  bedenkinge oor ander se uitlatings.

Met kennis van feite algemeen beskikbaar,  raak dit lastig vir enigiemand om met waardigheid hom onkundig te hou.

Al wat die mens homself nog kon wysmaak,  is dat alles wat mooi en goed is,  op die dood gerig is.

Om te  lewe is vir niemand ‘n einddoel nie.

Met woorde word daar gepoog om die werklikheid te beskryf;

en illusies geskep.

Om die lewe te verken met woorde is ‘n spel met vele beperkings,  tensy jy alleen speel.

In ordentlike kringe word dit stil gehou,  maar die waarheid is lank reeds nie meer strafbaar nie.

Dit bly egter ‘n skande om nie te huigel nie,  want  – moenie dit oorvertel nie – die waarheid is mos ‘n sonde.

Dit is ongelooflik,  maar eerlikheid bly ‘n bedreiging.

Met net die ontevredenes wat preek,  en luister,  is die lewe ‘n onaangename besigheid.

Alleman is tog so verontwaardig as ander vir hom lieg,  maar hy doen dit aan homself met oorgawe.

Almal wat strewe na die die vryheid om hul oortuigings uit te leef,   is tog so gretig om aan almal voor te skryf hoe hulle moet lewe.

Die natuur se manier van dinge doen,  is in menstaal bedrieglik.

Jy dink nog dis lekker,  dan ly jy.