Kersfees 2016

March 8, 2017 in Uncategorized

Die pas afgelope week het ek en my gesin die voorreg gehad om die Liggiefees by die Abram Kriel Kinderhuis mee te maak en wat ʼn pragervaring was dit nie!!  Die Liggiefees word hoogs aan te beveel en elke Potchefstromer moet dit as sy plig sien om die Liggiefees te besoek.

So sit ek daar by die Liggiefees, pannekoek en Coke Zero in die hand (het ek genoem die pannekoekbakker se hande is deur ʼn engel gesoen want die pannekoeke is absolute juwele), en ek sit vir die mense en kyk, my gunsteling tydverdryf.  By die Liggiefees is daar hierdie groot liggiehart waarin jy kan staan en dan kan jy foto’s van jouself en jou geliefde binne in die hart neem en maak of dit romanties is.  Die ry na die hart is lank en veral die vrouens is baie opgewonde oor die foto’tjies wat dan natuurlik hulle nuwe Whatsapp profielfoto’s gaan word en ʼn Facebook status update gaan word met iets soos #liefdevanmylewe, #liggiefees, #lekkerstepannekoekooit.  Die manne wat in die rye moet staan lyk minder opgewonde.  Weet nie hoekom nie want ek was baie opgewonde om ʼn foto saam met my vrou te neem, #ekskryfvirpunte.

Groot, klein, maer, vet, oud, jonk, geleerd en ongeleerd staan almal in die ellelange ry en wag ongeduldig vir die ry om korter te word sodat die Facebook status update gepost kan word, en terwyl hulle wag loer die mense vir mekaar.  Party loere was jaloers, party venynig, sommige in bewondering van iemand maar bitterlik min kyke en loere na die mede-hashtagmodelle was in liefde en omgee.

Nie in die gees van die Kersfees en die Liggiefees nie wonder ek met nog ʼn smul pannekoek saam.

Nou ek kom al 42 jaar saam met Kersfees en ek het op ʼn plaas grootgeword in Ventersdorp waar Kersfees gekenmerk is deur boerdery.  Desembermaande en Kersfeeste was tye vir wolkekyk en diepe gebed.  Tyd waar ploegskare en planters kersgesange van hoop moes sing.  Tyd waar stofwolke, donker bankbalanse en produksielenings soos wolwe agter Vader Krismis gelê en loer het.

My ma het egter altyd geglo aan ʼn egte kersboom.  Nie hierdie gekoopte Checkers bome met die sneeu oppie punte nie.  Egte boom, oor en uit.  Nou kersboompies groei nie eintlik in Ventersdorp in die morge nie en word nie gemeet aan kersbome gestroop per ton nie, so elke Kersfees is my ma met ʼn saag die plaas in en het met ʼn stuk dennetak die huis binnegestrompel en die ding is dan opgemaak vir ʼn kersboom.  Die boom/tak was altyd maar blerrie baie gebuig en het skeef in die sitkamer gelê en ek het altyd maar met skaamte en oordeel na die tak geloer en die Checkers-bome begeer.  Die Checkers-bome was so mooi en reguit.  Hy het soveel van ʼn perfekte Kersfees gesimboliseer waar daar nie droogtes was of gebreekte ratkaste nie en waar produksielenings iemand anders se probleem was.  Die Checkers boompies was so idillies en ek het so na die Checkers plastic boom gehoop dat ons eie, ons egte, ons plaasboom sy geur verloor het.  ʼn Regte, egte boom wat na den ruik wou ek vervang met ʼn stuk Made in China plastic kersboom?????

My punt is eenvoudig…

Ons kyk so baie na al die ander mense rondom ons dat ons vergeet wie en wat ons is en waarmee ons geseënd is.  Sosiale media oortuig ons dat dit goed gaan met almal want net hoogtepunte kry hashtags en ons werk so hard om ons eie lewens mooi te laat lyk net sodat ons net met ʼn hashtag of twee kan spog.  Ons vergeet dat elke mens sy eie kruis moet dra maar dit is soveel makliker om te oordeel want dan lyk ons eie bome glad nie meer so skeef nie.

Ons het sulke mooi egte bome in ons huise waarvoor ons dankbaar moet wees.  Kom ons los bietjie die plastic bome van sosiale media en van ander se dinge uit en ruik bietjie hoe ʼn dankbaarheidsden werklik ruik.  Kom ons fokus hierdie Kersfees op onsself en ons eie bome.  Elkeen op sy eie boom.  Nie ander se mooi of lelike bome nie.  Nie die bome van die waarmee dit klaarblyklik mee goed gaan nie en ook nie die bome van die waarmee dit sleg gaan en wie struikel en val oor die hekkies in hulle lewens nie.

Gun ander mense hul seëninge want deur dit te doen sien ons eintlik hoe geseënd ons werklik is.  Laat die toe wat struikel om te struikel sonder ons oordeel want struikel is moeilik en seer genoeg.

Laat die wat wil trou, trou en die wat alleen wil wees toe om alleen te wees.  Los die wat te veel eet om te veel te eet en die wat te min eet om dit te doen.  Los ander se beroepskeuses uit en los oom Gert wat ʼn doppie drink uit dat hy hierdie Kersfees sy doppie kan drink.  As jy nie van iemand se godsdienskeuse, seksuele orientasie of lewenswyse hou nie, moenie dit beofen nie.

Laat die enkelma toe om haar kinders met haar eie hartseer groot te maak en laat die weeskind toe om na sy eie liggies te kyk.  Laat al hierdie dinge gebeur met ʼn kyk van liefde want almal van ons se bome is gebuig, maar steeds ruik hulle na egte bome.  Kersfeesbome.

Ek hoop ek sien en ruik hierdie Kersfees net my eie skewe boom.

Leave a reply

Your email address will not be published. Required fields are marked *