Die Mooiste Vrou

Oktober 21, 2010 in Sonder kategorie

“Sy is die mooiste vrou wat julle nog gesien het,” hoor ek die oom verduidelik hier van die een kant af. Hy sit op ‘n rusbank en gesels met niemand eintlik in besonder nie. Ons sit in die ontvangslokaal van die hospitaal. Dis diep Desembervakansie, en my seuntjie het ‘n koors wat ons nie kan afkry nie. Nou sit ons en wag vir die doktor.

 

“Ons is vandag 50 jaar al getroud, sy is 12 jaar jonger as ek, maar sy is nog steeds die mooiste vrou wat jy nog gesien het.” Ek skat die oom so rondom 80 jaar oud.

 

Die sekuriteitswag draai ‘n plastiek stoel om en gaan sit teenoor die oom. “Is dit so, oom? Sjoe, maar dis ‘n lang tyd om getroud te wees,” vra hy belangstellend.  Die oom wend hom tot die sekuriteitswag en gesels verder oor sy vrou. Hy is so opgewonde oor sy vrou van vyftig jaar soos ‘n skoolseun oor sy eerste kys.

 

“Waar is sy dan nou, oom?” vra die sekuriteitswag.  Eintlik weet hy,

 

“Sy is hier binne, hulle gaan haar nóú bring, dan sal jy sien.” Die oom raak bietjie ongeduldig. Hy is al moeg gewag. Eintlik dink ek die oom stres ‘n bietjie. Dalk is hy bang hulle bring haar nié. Maar eintlik is hý die pasiënt, nie sý nie, kom ek mettertyd agter. Dit klink asof die oom homself soortvan ontslaan het uit die hospitaal, en die tante is nou nog besig met die dokter. Ek vermoed hy het dalk nie heeltemal die tannie se ondersteuning met dié dat hy nie in die hospitaal wil bly nie.

 

“Hulle bring die tannie nou-nou, oom,” staan ‘n verpleegster nader. “Sy gaan nou hier wees, kom ons help solank vir oom na oom se motor toe.”

 

“Nee, nee, ek was al by my kar. Dit help niks. Ek is nou al weer terug,” protesteer die oom. Die ou bene is nie meer so sterk soos die dag toe hy voor die kansel gestaan het nie, maar hy wil nie gehelp wees nie. “Nee, julle moet net vir háár bring dat ek haar kan huis toe neem.”

 

Almal in die ontvangslokaal luister saam. Mens kan nie eintlik anders nie, die vertrek is nie so groot nie. Ek neem die mense rondom my waar. Niemand is vermakerig nie. Niemand rol hul oë nie. Almal is vriendelik en simpatiek met die oom. Niemand lyk of hulle hom wil tune nie. Almal raak nou al nuuskierig oor sy vrou.

 

Uiteindelik kom sy vrou saam met ‘n verpleegster aangestap. Sy ís mooi. Die oom raak rustig. “Sien, dis my vrou,” beduie die oom trots. “Sien, ek het julle gesê sy is die mooiste vrou wat julle nog gesien het. Vyftig jaar is ons vandag getroud.” Hy neem haar arm in altwee sy hande. “Kom ons gaan huis toe, my skat.”

 

Die oom se bene sukkel bietjie toe hy trots met die tannie uitstap, maar die res van sy lyf huppel, en sy gesig lewe. Sy Kaap is weer Hollands.

 

Maar ek het tog die gevoel gekry dat die tannie se Kaap ‘n bietjie van ‘n besorgde reënwolkie het toe sy saam met hom daar uitstap.

2 antwoorde op Die Mooiste Vrou

  1. Druktyd het gesê op Oktober 21, 2010

    Oulike storie!

  2. antjienz het gesê op Oktober 21, 2010

    Ek het nou ‘n heeltemal ander uiteinde verwag…

Laat 'n Antwoord

Jou e-posadres sal nie gepubliseer word nie. Vereiste velde word aangedui as *.