Ouma se reukwaterbotteltjie..vir Godiva

November 18, 2013 in Uncategorized

Hierdie botteltjie kom al ‘n lang pad….

My Nederlandse ouma het dit as jong vrou present gekry by my oupa.Ek het nooit die voorreg gehad om hierdie twee mense te leer ken nie.Hulle was maar altyd vir my Oupa en Ouma Holland…twee vae figure waarvan ons net vergeelde foto’s gehad het.

My pa was een van vyf kinders en Oupa was ‘n skeepsingenieur en selde tuis.Werkskaarste het my pa laat besluit om groener weivelde in Suid-Afrika te kom soek.Na ‘n skeepsvaart van twee weke,het hy in 1936 in Kaapstad voet aan wal gesit.Dit moes vreeslik gewees het vir sy ouers,want die wêreld was nie daardie tyd so klein soos vandag nie.Hy het nooit weer sy pa gesien nie en slegs eenkeer na vyf-en-twintig jaar vir sy ma gaan kuier..sy is kort daarna oorlede.

Tydens die Tweede Wêreldoorlog het hulle ontsettend swaar gekry en my pa se oudste suster met haar man en dogter(my niggie) het net na die oorlog ook Suid-Afrika toe gekom.Dit was die jaar 1950.As afskeidsgeskenk het Ouma die leë botteltjie vir my niggie gegee.Ons is altwee Ouma se naamgenote.My niggie is 25 jaar ouer as ek en begin ook nou links en regs haar goed weggee.Dis hoe dit toe nou kom dat sy vir my die botteltjie gegee het.

Al is dit miskien nie veel werd nie,is dit my enigste band met ‘n ouma wat ek bitter graag sou wou ken.Dit voel of daar ‘n stuk van my is wat ek nooit sal verstaan nie…hulle sê mos bloed is dikker as water!

IMG_0415a

Die botteltjie het ‘n egte goue doppie,wat oop skarnier.Langsaan is ‘n glasproppie so groot soos my pinkienael.

IMG_0398a

Die kissie is pikswart en lyk soos ‘n vioolkis.Dis vol vlekke,seker van die reukwater wat uitgelek het.Mens kan niks meer ruik nie,net ouderdom en weemoed.

25 antwoorde op Ouma se reukwaterbotteltjie..vir Godiva

  1. Ag dis ‘n nice ding – het nog nooit so een in ‘n kis gesien nie!

  2. Godiva het gesê op November 18, 2013

    **********
    Hierdie is vir my jou beste pos ooit, ek is seker biased omdat ek so lief is vir onvervangbare ♡’s skatte soos die.
    Jy beskryf dit so raak met jou laaste sin oor ouderdom en weemoed.
    Al het jy haar nooit geken nie is daar nou n band tussen julle wat oor die dekades heen strek. Jy het iets fisies tasbaar wat duidelik baie geliefd was deur haar in jou besit. Baie dankie vir die lekkerlees blog.

    • Godiva het gesê op November 18, 2013

      P.s hopelik spoor dit die ander bloggers ook aan om hulle skatte met ons te deel.

    • @ladygodiva Baie dankie vir jou mooi woorde!Ek hoop ook die ander skryf oor hul ou goed.Ons het nou amper sommer ‘n ekstra tema saam met hierdie week se tema!

      • Godiva het gesê op November 18, 2013

        Plesier Perdebytjie, het die inskrywing sommer baie geniet.
        Ja ek hoop ook so, alhoewel vintage en antieke items nou nie in almal se smaak val dalk nie.

        Ek moet seker ook bydraes by die ander temas doen, so gewoond al die jare om net nou en dan lukrake blog challenges te rig 🙂

  3. tina10 het gesê op November 18, 2013

    Oooooo dis so spesiaal

  4. O dis so mooi en so spesiaal!

  5. Sjoe, jy moet dit bewaar vir die nageslag saam met die geskiedenis daarvan

  6. lora2me het gesê op November 18, 2013

    Dis ‘n mooi, storie. Jy moet ‘n foto-afskriffie van jou ouma oprol en binne-in jou botteltjie hou as herinnering. Dis die eerste keer dat ek so ‘n klein tassie/boksie vir ‘n parfuumbotteltjie sien. Besonders.

  7. @lora2me Dis nou ‘n uitstekende idee!Ek gaan dit sommer hierdie naweek doen en dan die geskiedenis daarby neerskryf.

  8. Elly het gesê op November 18, 2013

    Dit is so spesiaal. En mooi.

  9. Mooi storie. Dankie

  10. @daniec Dankie vir die lees!

  11. Dis sulke goed wat ons maak wat ons is…….Pragtige skrywe!

  12. Hoe bly sou jou ouma gewees het om te weet dat die botteltjie waardeer en gekoester word!

  13. @frandr Wanneer jy rustiger raak moet jy asb kom vertel wat jou so besig gehou het.Ek mis jou oulike skryfgoed.

Laat 'n Antwoord

Jou e-posadres sal nie gepubliseer word nie. Vereiste velde word aangedui as *.