Jy blaai in die argief vir 2012 November.

Kleinboet gaan ouma groet

November 28, 2012 in Uncategorized

Vroulief het klaar besluit. Net Kleinboet gaan die speech maak, want hy kan en hy wil graag. Hy bel my vanoggend. Hy soek die URL van seker die mooiste klavierstuk denkbaar: Impromptu in A mol van Schubert. Hy wil dit as agtergrondmusiek speel terwyl hy praat. Beter helfte dink dit is ‘n brilnante idee.

Jammer, ek kan nog nie lekker songs plak nie, maar hier is die URL
https://www.facebook.com/video/video.php?v=10150482903287989

Geagte familie en vriende,
Dit is vir my vandag ‘n groot voorreg om vir Ouma Miemie met ‘n paar spesiale woorde in die kerk te groet. Ouma Miemie was vir haar kinders, kleinkinders, familie en vriende baie kosbaar. Ma het ‘n paar fotos gaan opdiep wat ek graag as meelewende agtergrond op die skerm wil wys terwyl Frans Schubert se meesterlike Impromptu in A mol in die agtergrond speel. Schubert se mooi reëndruppeltjies laat my aan Ouma dink.

Nege minute verder: Ouma se heengaan het vir ons ‘n baie spesiale boodskap, soos verwoord in Ina Rosseau se pragtige gedig, Keerdatum

Hoe kry ek my lewe
betyds klaar geleef
in die klein bestek vir
my beskik,
as die ure nou
tot sekondes slink
en wik-wik-wik-wik
my hart en die wekkers
elke dag elke nag
bietjie
vinniger tik

Ouma se keerdatum was 23 November 2012. Ouma, ons groet jou.
Ek dank U.

Mooi dag verder,
Ouboet.

Wie sal ek uitnooi?

November 27, 2012 in Uncategorized

Wie sal ek uitnooi vir ete?
1. Stephen Hawking om naby sy enorme breinkrag te wees
2. Helen Keller om iets by ‘n vrou wat ‘n massiewe voorbeeld gestel het te leer
3. DJ Opperman, om met die skeppendste kunstenaar in Afrikaans se blad te skud
4. Madiba, om na die ikoon wat “die kind” in die parlement voorgelees het te luister
5. Martin Luther King jnr om die man wat beste toespraak van alle tye gelewer het te hoor praat
6. Diane Lane, om na seker die mooiste vrou wat leef te staar
7. Mark Zuckerberg om te probeer agterkom hoe dink Generation Y
8. My oupagrootjie Jacobus Petrus Naude (1851-1933) om die patriarg in aksie te sien. Jammer vir die Engels: …..I thank him for the genetic gift of hastiness. He mastered a winning trait of the new world way back in the Victorian age and braved forth towards a world he deserved but didn’t see.

Wat sal ons eet? ‘n Lam op die spit met bykos na smaak. Modderkoekie sal vir ons nagereg voorsit.

Wie van my blogvriende sal ek uitnooi? Die stoep is groot en al 43 vriende is meer as welkom.

Genadelig

November 25, 2012 in Uncategorized

God se genadelig het vir 96 jaar oor ons moeder, ouma en vriendin geskyn, tot Hy haar op 23 November 2012 vir hoër diens opgeroep het. Dit is ons bede dat ons Hemelse Vader ‘n nuwe uur van groot genade sal stuur en dat Hy die eerste troos teen ‘n nuwe horison sal kaats. Ons berus by die wete dat haar gestolde woorde lig oor ons pad sal skyn en ons altyd sal inspireer.

1. NADER, MY GOD, BY U –
STEEDS NADERBY!
AL IS DAAR OOK ‘N KRUIS
NODIG VIR MY.
DAN SAL MY LIED NOG BLY:
NADER, MY GOD, BY U –
NOG NADERBY!

2. AL IS EK VER OP REIS,
DWAAL EK ALLEEN;
AL MOET OOK SNAGS MY HOOF
RUS OP ‘N STEEN;
DAN BRING MY DROME MY
NADER, MY GOD, BY U –
NOG NADERBY!

3. DAN SIEN MY GEESTESOOG
‘N HEMELLEER:
ENG’LE GAAN DAAR OMHOOG
EN DAAL WEER NEER;
HUL WINK EN ROEP VIR MY
NADER, MY GOD, BY U –
NOG NADERBY!

4. EN AS EK DAN ONTWAAK,
VOL VAN U LOF,
RIG EK MY ALTAAR DAAR
OP UIT DIE STOF.
SO KAN BEPROEWING LEI
NADER, MY GOD, BY U –
NOG NADERBY!

5. EN WORD EK HIERVANDAAN
EENMAAL GEDRA,
DAN VAAR EK HEMELWAARTS
DEUR U GENA;
DAN SAL MY LIED NOG BLY:
NADER, MY GOD, BY U –
NOG NADERBY!

Tot wedersiens ouma

November 24, 2012 in Uncategorized

Huldeblyk en bedankings by die gedenkdiens van ons moeder, skoonmoeder, tannie en ouma: Miems De Kerk (1916-2012)

Geagte familie en vriende,

Dit is vir my vandag ‘n groot voorreg om vir Ma en Ouma Miems met ‘n paar spesiale woorde te groet. Ma Miems was vir haar kinders, kleinkinders, familie en vriende baie kosbaar. Ek het ‘n paar fotos gaan opdiep wat ek graag op die skerm wil wys.

Dit is jammer dat haar gees en ‘n groot deel van haar menswees haar ‘n paar jaar gelede reeds verlaat het, en dat sy eers 3 dae gelede haar laaste asem uitgeblaas het. As ek dus aan ma Miems dink, dan dink ek aan haar tot en met haar negentigste verjaarsdag. Ek onthou die sprankelende mens wie se hande vir niks verkeerd gestaan het nie. Ek dink aan haar heerlike kos en aan haar pragtige hourtsneewerk en borduurwerk. Die deugsame ma Miems sal ek nooit vergeet nie.
Ouma Miems was baiekeer ‘n besprekingspunt in ons huishouding. Met die verantwoordelikhede van skooltake is daar tot gedigte oor haar geskryf, en ek haal ‘n minder ernstige een aan:

Ouma

Sy raak al hoe korter
want haar ruggraat krimp

Sy raak al hoe slimmer
want sy luister minder

Sy praat al hoe meer
want sy onthou veel minder

Tog was dié kort, slim
en spraaksame mens

ook eens skugter
en sprakeloos

….dalk bang om eendag
oud en lelik te word…

Ja, sy het oud geword, baie oud, bykans ‘n eeu, maar sy het nooit lelik geword nie. Maar soos wat die jare aangestap het, is die kwesbaarheid in haar raakgesien wat die kinders na die pen laat gryp het:

Ouderdom. ‘ n Ode vir vir ouma

Ouma…
Die peerboom sal nie
weer wit blom nie
Die gety suig te sterk
vir sagte woorde
Briektraag
stomp woorde
plavei hulself
en rig die stroom vanself
soos wat die gety vanself
voortsnel
Soos oudword gebeur alles
sommer vanself
pretensieloos
rigtingvas
en tranerig
soos die knop in die keel

Ek glo die oudwordproses was nie altyd maklik nie, maar sy het haar jare met grasie gedra en vrede gemaak.

Altyd dieper
skik helaas in nootloos
en verwronge melodieë

Ouma, ek teken jou vir oulaas weer
met elke lyn van die kaart
wat dikker word
soos elke vou
sy landskap vind
in die spieël,
vir oulaas weer,
steeds dieper
as die vorige keer

hier waar elke
golf jou kreukels en kontoere
feller en steeds dieper wys

In haar helder dae het ma Miems het vir haar ‘n baie spesiale plekkie in die groot geheue van die heelal oopgekerf.

Groot geheue

Almal soek ‘n plekkie want
tensy jy Einstein of da Vinci is
raak jy gou vergete

Tik en hardklop skuif die wyser aan
oor geslagte en gestolde woorde
almal beur voort vir ‘n plekkie

Mens verdig tot legger
ry op ry in staatsargief
vergader stof en raak vergete

Almal veg vir net ‘n plekkie
in die hard disc van die groot heelal
terwyl ons nog brood en stroop en woorde het

Haar woorde het haar verlaat, maar die spore wat sy gelaat het sal nie uitgevee kan word nie.

Vergun my ook enkele bedankings:

• Aan suster Esta, die vlytige verpleegsuster, wat ma oor jare so ondersteun en fisies bygestaan het, baie dankie vir jou hulp. Dit word ongelooflik gewaardeer
• Aan al haar vriendinne wat haar oor jare so mooi onderteun en gelukkig gemaak het, baie dankie.
• Aan u almal wat vandag ‘n laaste eer aan haar betoon, baie dankie vir julle teenwoordigheid
• Aan Huis Herfsblaar waar Ma haar leeste jare deurgebring het, baie dankie, veral vir die verpleegpersoneel wat Ma in die laaste jaar of wat so mooi versorg het

Ma, Ouma, tannie en vriendin, ons sê baie dankie vir die vele mooi jare

Ek dank U.

Help asseblief.

November 22, 2012 in Uncategorized

Kan iemand slimmer as ek my help asb. Ek het seker al twaalf keer die moderasie-link gevolg en almal “approve”. Snaaks daar bly 21 “uitstaande” op die link. Ek glo moderasie van almal is gedoen, maar hoekom wys die counter dan nie nul nie.

Sover het ek net een site gekry wat meer gebruikersonvriendelik is as hierdie een: ‘n Skotse universiteit vir wie ek werk doen se “blackbord”. In elk geval mens is nooit te oud om te leer nie.

Hiers ek weer. Kleinboet se party

November 20, 2012 in Uncategorized

Ouboet jou oorgeslaande leek. Modereer jou antwoorde. OK, jammer ek het, en nou probeer ek weer. Die 21st was massief lekker. My speech was toe net 29 minute, hoofsaaklik memorabilia uit 21 jaar se geleefde werklikhede. Toe ek sy foto as pasgebore baba op die skerm gooi, toe kry Kleinboet ‘n staande ovasie. Slegs 55 van die geskatte 70 gaste het toe opgedaag. Snaaks, sy hele vriendskapbasis het Potch toe geskuif en relatief min ou plaaslike vriende het opgedaag. Meer as 90% was toe onbevoeg om te bestuur en het oorgeslaap.

Seun se vaste meisie is eers gister terug Bethal toe. Wat ‘n pragtige kind. Toe ek die skare vertel ons Naude-voorgeslagte het Bethal in 1881 gestig, is seun se keuse met waardering begroet.

Sy meisie is uitsonderlik pragtig. Kleinboet se ambisie vertel ‘n verhaal van strewes en vasbyt. Sy meisie is ‘n derdejaar LLB-student en prim van haar koshuis. Hy is tweedejaar, maar hulle kom gelukkig uit dieselfde oesjaar, 1991. Toe ek haar vra of sy nie punte as Prim verloor omdat sy met ‘n tweedejaar vassleep nie, toe antwoord sy: Oom, Deklerk is enig in sy soort. Hy is my eerste keuse en basta met die res. Ons is mal oor mekaar en dit is die belangrikste. Die liefde het nie beperkende reels nie.

Kleinboet se ma was ontsteld omdat sy uitsonderlike lang hare so woes staan en hy volgens haar in die proses punte verloor. “Jy kan nie ‘n tang en ‘n goeie leier wees nie” Toe ek ook vir hom se hy lyk soos ‘n gat wat half afgevee is, toe neem hy gister die elektriese haarsnyer en skeer homself poenskop. Meisie help en lag lekker saam. Nou wil hy die enorme bos dik hare van seker amper 15 cm vir die kankervereniging skenk. Well done seun.

Modererende groete,

ouboet

Cheers

November 20, 2012 in Uncategorized

Nee wat, om vir die laaste 3 bloginskrywings GEEN kommentaar te trek nie is effens kras op die ego. Wat maak ek hier in hierdie persoonlikhiedslose tegnologiese mistasting?

Ek is noe bedeeld met die gawes van Nortradamus of Siener van Rensburg nie, maar ek het die volgede visie: Ek sien ‘n bolletjie snot. Hy word mooi opgerol en onder die tafel geplak. Ou vriende raak vervelig met mekaar. Die bolletjie word droog en word dan soos stof weggewaai.

Geniet julle dag.

Jongste se 21st vanaand

November 16, 2012 in Uncategorized

Vanaand word Kleinboet se 21st gehou, alhoewel hy eers op 4 Desember verjaar. Hy wou die partytjie hou voordat die universiteit sluit sodat al sy maats wat ver bly kan bywoon. Hy het ons die versekering gegee dat hy vermoed die aantal gaste gaan nie meer as 70 wees nie.

Omdat parkeerplek hier teen die berg skaarser as piesangpitte is, reel ek toe met die skool 300 meter bult af, dat die kinders se karre onder toesig van ‘n wag daar toegesluit word. Ek vermoed die opstap gaan hulle dors maak.

Die kontrakteurs sou gister klaar gewees het met die vervanging van seilkkappies van die huis en afdakke om die stoep. Nou hoor ek net elektriese bore, rivitmasjiene, snotklappe en f-woorde wat ruim uitgedeel word. Ek twyfel of fulle voor 8-uur vanaand gaan klaar wees. Gelukkig is my ooreenkoms met hom dat finale betaling slegs op 16 November geskied, mits die werk klaar is.

Intussen kan die gras nie gesny word nie, die stoele nie uitgedra word nie,die speakers nie geinstalleer word nie en die caterers nie hulle toerusting op site kry nie.

Gelukkig is my speech klaar. Ja, 77 Powerpoint slides gaan die mooi oomblikke oor 21 jaar saamvat. Van ‘n foto direk na sy geboorte tot by sy aanvallige vaste meisie van drie weke wat in Bethal woon gaan aan die skare op die big screen voorgehou word. Hy het by sy meisie gespog dat sy voorsate haar tuisdorp gestig het en so ‘n paar punte verdien. Sy versoek: Pa, vertel ook van die stigter van Bethal, en van Philippe Naude (sy 7x groot-oupagrootjie wat ‘n professor in wiskunde in Berlyn was en met Leibnitz gekorrespondeer het.)

Ek sal ook die reels aankondig. Die tuin is beskikbaar vir amper alles, behalwe urinering. Gaste wat meer as 2 lemonades gedrink het mag nie die perseel verlaat voordat hulle hulle babelaas afgeslaap het nie. Daar word ook nie van die hoë braaiplak in die swembad geduik of gespring nie, want bloed mag net dalk nie nuwe marbelite vlek.

Met die drankaankope het Kleinboet vermoed 25 bottels Vodka gaan dalk genoeg vir die punch wees. Om moontlike laatnagdors te voorkom gaan koop ek toe ook 10 bottels tweeliter rooiwyn. Na my speech gaan ons en die bure lank uiteet om oordrom-irritasie bietjie uit te rek. Gelukkig is sy ouboet van 26 dan in charge. Vyf jaar gelede was hy deur ‘n soortgelyke gefuifery en is dus volkome vertroud met die uitdgings (en ongelukkig ook geleenthede.) maar wie weet, dalk ontmoet hy sy trougirl vanaand en ouboet word in die afsienbare toekoms oupa.

Geniet julle naweek

Stoepgroete,

ouboet

Hoekom ek laaglê

November 12, 2012 in Uncategorized

Die huidige blogsisteem werk myns insiens gladnie. Die lese en kommentare het beduidend afgeneem en dit voel of ek op ‘n vreemde plek is elke keer wat ek probeer inloer. Hoekom bestaan die statistiek nie meer nie?

Nee wat, ek gaan kyk eerder rolbal of jukskei as om my tyd hier te mors.

Groete

ouboet

Waardebepaling van ons nuwe blogs

November 8, 2012 in Uncategorized

Ek dink die huidige blogtuiste is beduidend swakker as wat ons gehad het. Die werking is baie moeiliker en die instruksies in Afrikaans klink vreemd, byvoorbeeld: Die forumskomponent is nog nie opgestel nie. Nou wat sou dit nou beteken?

Dit is net so gebruikersonvriendelik soos Afrikaanse instruksies op ‘n selfoon, of die kitsbank. Dis amper soos briek, clutch en welding rod. Die Engelse weergawe is lekker in Afrikaans

Voorheen het ons lekker gekuier, nou is dit vreemd en kil. Dit is hoekom ek so lank wegbly.

As ek vir die ou gewaad nege uit tien gegee het, kry die huidige een net een uit tien. Wat dink julle?

Groete

ouboet