Jy blaai in die argief vir 2012 Oktober.

Baie geluk aan die WP

Oktober 28, 2012 in Uncategorized

Gee die vyand wat hom toekom. Ja na 11 jaar hou die manne in die Kaap weer ‘n beker vas. Dit was werklik ‘n skouspel van heerlike rugby. Dit wys mens net jy moet nooit die underdog afskryf nie. Arme Plumtree. Het julle sy gesig gesien?  Dit het gelyk of hy iets ruik wat nie lekker ruik nie.

My keuse van speler van die wedstryd sou Eben Etsebeth gewees het, maar kaptein Deon Fourie was ook puik. Etsebeth speel briljant en hy is ‘n lynstaanmeester sonder gelyke. Maak nie saak wie die bal ingooi nie, Etsebeth wen hom vir die wenspan. Ek vermoed hierdie reus gaan aangewys word as speler van die jaar.

Geniet die dag verder.

 

Gee my ‘n verkyker asb

Oktober 26, 2012 in Uncategorized

…sodat ek my eie avatar en naam kan sien. Die goed is kleiner as die Springbokke se nommertjies op die rug. Geniet julle naweek.

Wie onthou die Dogmor advertensie?

Oktober 26, 2012 in Uncategorized

Een van die heel beste advertensies ooit was die Dogmor een van die enorme groot hond in die deftige kar wat,  toe hy gevra word hoekom hy van Dogmor hou heel pittig antwoord: “Die lekker sous” Alle honde wat na hom in advertensies “praat” is vir my benede reklamestandaarde.  Jammer, ek praat van seker so 30 jaar terug so ek glo nie die meeste bloggers sal hom kan oproep nie.

Lekker naweek

ouboet

Waar gaan die koppie staan?

Oktober 26, 2012 in Uncategorized

In Durban natuurlik. Die Kapenaars het vergeet hoe hou mens ‘n beker vas en ek dink die Sharks is net te sterk.  My Groot vriend en getroue WP ondersteuner in die Kaap gaan my seker slag, maar so be it. ‘n Voorspelling: Sharks 34, WP, 13.

Ek sien die besoeke op die nuwe tuiste is maar swak maar kom ons hou die situasie fyn dop. Ek dink die aanbiedings van die blogmoontlikhede en gebruike hier is swak. Byvoorbeeld hoe stel mens die font en tel jou besoeke?

Lekker kyk en groete,

 

ouboet

Eerste indrukke

Oktober 21, 2012 in Uncategorized

Lyk nie of hier veel aangaan nie. Lyk nie asof die blogs juis traffice trek nie. Ons sal seker maar aan die verandering gewoond moet raak.

 

Mooi dag

 

ouboet

Nostalgie uit die sewentigs. ‘n Ware verhaaltjie

Oktober 20, 2012 in Uncategorized

Ek probeer nog en plak ‘n ou stuk, wat ek gaan soek het. Ek kan dus al soek, vind  en plak. Lekker naweek. Ek is die naweek alleen want beter helfte het by haar vriendinne gaan kuier om hulle reunie te reel.

Aan die einde van my derde jaar het ek tussen twee verkoopstoere as student ‘n stukke naastediens verrig. Oom Meyer, ons buurman, het my gevra om sy kar Knysna toe te bestuur.Oom Meyer was ‘n baie aangename mens wat die lekkerste “curry” gemaak het. Hy het op sy oudag besluit om weer te trou, met sy oorlede broer se vrou wat in Knysna gebly het.

My taak was om hom en al sy aardse besittings met sy nuwe Datsun 120 GX Knysna toe te neem. Hy het vir my ‘n treinkaartjie vir die rit teruggekoop.Met sy kontakte as afgetrede spoorwegamptenaar het hy vir my ‘n coupe op my eie gereel. Hy was van oordeel dat ek plek moes hê as ‘n geleentheid homself sou voordoen. In elk geval, die pragtige blougroen GX het behoorlik gehang van al die bagasie. Op die agtersitplek was ‘n enorme trommel. Ek moes die sitplekke tot heel voor skuif om die groen trommel in te kry. Met my lyf van ‘n volle ses voet ses het ek moeilik ingekom en elke keer die flikkerlig met my knie aangesit as ek die koppelaar of rem (clutch of briek) trap. In daardie tyd was die GX een van die heel vinnigste klein karretjies op die pad.Oom Meyer was haastig om by sy nuwe bruid te kom en het gereëld gesê: “Trap haar Loewie…Vanaand is die aand…..”, verwysende na die ou girl wat uitsien na sy koms. So gesê, so gemaak en in ‘n rekordtyd hou ons voor die bruid se huis stil. My hele lyf was seer en toe ek uit die kar klim het ek kompleet gelyk soos ‘n kameelperd wat water drink. Ek moes eers drie dae of wat by hulle oorbly. Een aand het hulle vir my ‘n date gereël. ‘n Heel skaflike mooi meisie het my met haar Volvo kom haal en ons het ‘n paar drankies by die Beacon Isle in Plettenbergbaai gaan drink en langs die see gaan loop. Die laaste aand het ek Knysna per voet verken. Ek het ‘n mooi wit langmou T-hemptipe kledingstuk met Universiteit van Pretoria op die bors aangehad.

Soos die fruit salad (gestreepte Tukkiebaadjie wat wondere tydens die verkoopstoere verrig het) trek die wapen met die ossewa, die drie ringe en die by, groot aandag, veral in afgeleë plekke met min hubare talent. Tydens my verkenning stap ek toe toevallig by die stadsaal verby. Daar was ‘n enorme makietie met mooi boeremusiek aan die ontplooi, iets soos die jaarlikse duikklub-of visvangdans. Buite die saal het ‘n pragtige meisie gestaan, alleen, mistroostig in die liefde verlaat en het met brose en gekweste oë ‘n oplossing in die soel aandlug gesoek.

Haar metgesel is op die nippertjie vir hoër diens opgeroep;‘n ongeval of so iets. Sy kon die duur kaartjies nie betyds van die hand sit nie. Ek het gou kontak gemaak en haar ook my status as enkeleng meegedeel. Soekende mense snap gou. Daar was egter een groot beperking. Die geselligheid was erg formeel. ’n Kort debat het vir ‘n gangbare oplossing gesorg. Ons is met haar Volla daar weg en ek het eers my enigste en erg gekreukelde langmouhemp onder in my tas gaan uitkrap. Daarna het ons ‘n das by haar pa gaan leen, sy het my hemp gestryk en ek en my nuutgevonde metgesel het by die luisterryke geselskap in die stadsaal aangesluit.

Dit was een enorme groot fees met kreef, kwaliteit wyn en die allerbeste én pragtigste dansmaat denkbaar. Mens lees gewoonlik van geleenthede soos dié in Tryna Du Toit se storieboeke. Die treinrit terug was ook lekker. Op ‘n stadium het ons een van die stylste opdraendes spin-spin tegemoetgegaan. As voormalige stoker ken ek hierdie spin-en-vat-aksie baie goed.

Hulle ruk jou vuur meestal uitmekaar. As ek reg kan onthou het oom Meyer se visie van ‘n geleentheid in die coupe ook nie grealiseer nie.

Opinies oor TV

Oktober 20, 2012 in Uncategorized

Sorry ek toets nog

 

Wat beskou jy as die beste TV programme of kanale?

  • Nuus op kanaal 403
  • Kanaal 201
  • Travel channel
  • History channel

Wat beshou jy as onkykbaar?

  • Parys Parys
  • Oupa en ouma
  • Gelukkig is Proesstraat verby, maar nou sien ek OrkneySnorknie is terug. Wat ‘n totale mors van tyd

Hallo

Oktober 20, 2012 in Uncategorized

Hoe gaan dit<

 

Groete

 

ouboet

Waarheen is die tegnologie oppad?

Oktober 17, 2012 in Uncategorized

Beheer tegnologie ons lewens?

‘n Eerlike antwoord op hierdie vraag is ‘n duidelike ja. Tegnologie beheer ons lewens, of ons nou daarvan hou of nie.  U mag wel se dat u  nie ‘n selfoon besit nie, nie televisie kyk nie, nie rekenaarvaardig is nie, of nie eens koerante lees nie, maar u lewe word daagliks deur tegnologie beheer.  

Al sluit u uself in afsondering, weg van die tegnologie af toe, moet u tog steeds eet, nie waar nie, en dit is juis hier waar die tegnologie ons almal se lewens beheer.  Al plant u u eie groente of melk u eie koeie en slag u eie hoenders, u sal nie lank aan die lewe bly sonder om iets te koop nie.

Ek wil vandag slegs een stukkie tegnologie uitsonder wat almal se lewens daagliks beinvloed, naamlik die tweedimensionele staafkode. Ons sien hierdie stukkie zebrastreep daagliks op elke produk wat ons koop. Hierdie uitsonderlike metode bestaan uit strepies wat ‘n magdom van inligting bevat.  Volgens wet moet elkeen van ons op 16 ‘n identiteitsdokument he. Op die eerste bladsy sal u die staafkode sien. Feitlik geen aspek wat ons lewens daagliks raak maak sin sonder die zebrastrepe nie.

Ek wil graag ‘n paar gebruike van die zebrastreep uitsonder:

·    As ‘n produk se prys verhoog is dit nie nodig om elke blikkie kondensmelk of stuk kaas se prysetiket te verander nie. Die sentrale rekenaar doen dit outomaties.
·    Die eienaar van die winkel weet presies hoeveel voorraad in sy winkel is, sonder om elke item te tel.
·    Hy weet presies wanneer om nuwe vorraad te bestel.
·    Die kode op jou identiteitsdokument bevat alle noodsaaklike inligting omtrent jou.
·    Selfs spoedoortredings word deesdae met behulp van die kode op ‘n sentrale rekenaar geplaas.
·    Die tweedimensionele staafkode en sentrale rekenaars begin al meer om ons lewens te beheer.

Kan ons die tegnologie vryspring? Ek glo nie.

My advies aan julle wat nie televisie kyk nie, nie ‘n selfoon besit nie of nie rekenaarvaardig is nie, vergeet daarvan dat julle tegnologie kan ontglip. Wees byderwets en probeer eerder munt slaan uit die tegnologiese aanslag. Hoe meer ons weet van die tegnologie wat ons lewens beheer, hoe beter is ons voorbereid vir die toekoms.

Nota: Sedert hierdie stukkie meer as ‘n dekade elede geskryf is, het ‘n paar stukkies nuwe tegnologie die lig gesien. Jammer dit is in Engels:

  • FID labelling systems (Radio Frequency identification)
  • NFC Payments Contactless NFC (Near Field Communication)
  • Consumer-interactive barcodes.  Tag Reader that allows users to snap photos of interactive 2D bar codes and immediately be transported to more information.
  • Augmented Reality aided selection (creating a virtual experience.)

‘n Tegnologies gestremde boorling soos ek raak bang vir die toekoms. Ek weet nie eers aldag hoe werk die TV remote nie.

Nuwe rekord en harsingskudding. Uiterstes in die gesin.

Oktober 16, 2012 in Sonder kategorie

Hier volg twee onlangse insidente in die huishouding.

1) Wie van julle ken dubbelspronge met ‘n springtou? Die tou moet tweekeer ombeweeg met een sprong. Dit is nogal heel moeilik. In standerd ses kon ek 37 dubbelsproge doen wat destyds nogal goed was.

Onthou, die spronge moet direk na mekaar gedoen word, wat nie net gou moegmaak nie, maar ook intense konsentrasie en koordinasie verg.

Ek kry netnou ‘n SMS van Kleinboet van Potch af: Hey pa…. Springtourekord opgeskuif na 95. Toe laat weet ek hom: Geluk seun. Gaan vir 100.

Is hier dalk iemand (bv ‘n boksafrigter of LO-onderwyser) wat weet of 95 dubbelspronge goed is. Ek dink nogal so.

2) Met oudste gaan dit tans nie baie goed nie. Hy het harsingskudding opgedoen toe hy laatnag in die reen geskruikel het en sy kop teen die staalhek te pletter geval het. ‘n Vriend (drinkebroer) het hom 0:100 afgelaai, en teen 4:30 het ons geluide buite gehoor. Slotsom na ‘n besoek aan die GP is dat hy vir meer as drie uur bewusteloos was. Vroulief het gedink hy was getrek omdat hy onsamehangend gepraat het en erge bloed in sy gesig en aan sy klere gehad het. Dalk aangerand?? GP het bevestig dat dit beslis die harsingskudding en nie dronkverdriet was nie. Vroulief het hom om verskoning gevra.

Ek vermoed ‘n groot merk aan sy voorkop gaan hom eendag aan ‘n oggend in Oktober 2012 herinner. 

 

Groete