Jy blaai in die argief vir 2012 Julie.

Geluk Sharks

Julie 29, 2012 in Sonder kategorie

Julle het julle puik van julle taak gekwyt. Arme Brian huil toe openlik voor die skare. My groot vriend en Stormer reken toe hy het nie genoeg Skotse spierverslapper in die huis om sy pyn in bedwang te hou nie.Kaptein Jean is reg. Hulle gaan nie gou oor hierdie enetjie kom nie.

Een ding weet ons nou sonder twyfel. Die Springbokvoorry MAG maar skrum. Kom ons kyk wat gebeur teen die Chiefs. Net jammer die Sharks moet nou weer ure vlieg, maar dit is deel van die spel.

 

Etzebeth jou yster.Jy het Bismarck mooi geloop.

 

Groete tot later

Waar gaan die koppie staan?

Julie 28, 2012 in Sonder kategorie

Ek vermoed in Hamilton. Dit is nie dat ek negatief is nie, maar dit is bloot my verstand wat my inlig.


Om die Super 15 behoorlik te geniet, moet mens die hele kompetisie so volledig moontlik volg van begin tot einde. Die Chiefs se opbou na die finaal het nogal selfvertroue uitgestraal.


Toe hulle die sewevoudige kampioene die Crusaders wen, toe sien ek in my geestesoog waar die Super 15-koppie gaan staan.


As die Sharks vanmiddag wen, is daar nie juis enige kans dat hulle die magtige Chiefs op hul tuisveld gaan wen nie.


As die Stormers wen, kan die finaal hier te lande dalk meer kykbaar wees.

Wat is die voordeel as jou span nie speel nie? Mens kan die rugby ten volle geniet sonder vrees vir verlies van blaasbeheer. 


Mooi naweek verder

Wie gaan wen?

Julie 27, 2012 in Sonder kategorie

My verstand sê vir my die Stormers gaan naelskraap wen, maar ek hoop die Sharks dring deur finaal toe.

Met die Bulls se swak spel teen die Crusaders was ek bitter teleurgesteld. Nou ondersteun ek die Sharks.


Wat dink en voel julle?

Dalk is die Springbokvoorry en JP Pietersen die antwoord om die vyand te tem.

Mooi dag verder.

Heerlike naweek.

Julie 16, 2012 in Sonder kategorie

Ons gesinnetjie was die naweek in die jagveld. Seuns het elk 2 bokke geskiet en meer as aan die verwagtinge voldoen. Die Remington Magnum en 308 was albei in die kol.

Toe sê ouboet jnr hy wil graag vir sy oom wat met die wapenlisensie-hernuwingsprobleem vir hom ‘n .222 en ‘n twaalfboor persent gegee het, ook ‘n bok skiet.  Toe wil hy graag die .222 gebruik, wat teen die reëls is. Toe beding ouboet ‘n uitsondering met die PH en ‘n halfuur later val oom John se bok.

Dit was ongelooflik koud, maar ‘n groot vuur en rooiwyn saans het baie gehelp om die lang kuiers behaaglik te maak.

Groete

Geluk Sharks

Julie 7, 2012 in Sonder kategorie

Julle was beduidend beter as die Bulls. Dit is nogal teleurstellend as dinge nie naastenby uitwerk soos beplan nie. Tegnies was ons nooit juis in die prentjie nie.

Nou moet die Cheetahs ook net hulle ding teen die vyand doen.

Geniet die dag.

Moenie mekaar lip gee nie.

Julie 6, 2012 in Sonder kategorie

Twee bloggers van statuur gee mekaar bietjie lip. Hulle sal weet van wie ek praat. Asseblief, agree to disagree, maar hou dit stigtelik en dies meer.

A people free to choose will always choose peace.
Ronald Reagan

Stoepgroete,

Vrederegter

Ouboet

Ouboet is nie lekker nie

Julie 4, 2012 in Sonder kategorie

So ‘n jaar gelede stap ek die hotel in Bloemfontein binne. My regterbeen reageer nie soos normaal nie en my regtervoet begin effens moeilik optel. Ontvangsdame vra of ek OK is. Na elke vliegtuigrit daarna sukkel ek om vir ‘n ruk ordentlik te loop.


Na herhaalde onsuksesvolle opvolgbesoeke aan die radioloog, ortopeed, neuroloog, fisioterapeut en ander ondersoekers wat my “shock” en naalde in my rug en boude inwurg, stuur GP my neurochirurg toe wat my laat opneem en verskeie rugmurg- en breinscans by die MR Instituut laat doen.


Ek ly aan klausterfobia en daai kop eerste in die tonnel het my amper letterlik laat kopuittrek. Gelukkig het hulle my goed gespuit voor die tyd vir “kalmte”, maar niks help teen daai oorverdowende byklanke wat soos klippe op ‘n sinkdak klink nie.


Ek verstaan nie heeltemal die spesialiste se taal nie, maar ‘n operasie (loslating) tussen 4 en 5 (whatever dit ook al mag beteken), mag verligting met die beenbeweging bring. Ander “letstels” in die senuweesisteem (whatever dit ook al mag beteken) kan moontlik verbeter word met medikasie, of ten minste verdere verswakking onderdruk.


Wat was nog negatief in die hospitaal? Hulle wou my nie gister ontslaan nie en toe mis ek ouboet jnr se 26ste verjaarsdagparty. Die klein porsies aandkos wat nie eers ‘n klein en ondergewig kleuterdogtertjie sal volkry nie is ook myns insiens teen die grondwet. Toe stap ek maar hospitaalcafe toe.

 

Op hierdie trant groet ek julle vir eers.


Hinkende-pinkende-groete

 

ouboet