Agter die Groen Deur

Nogal 'n moeilike gedig om met tweedetaalseuns te doen. Dis NP van Wyk Louw se diepsinnige gedagtes hier, maar elke nou en dan gebeur dit in die klaskamer: die seuns luister. Seker ook omdat dit nie die laaste periode was soos die vorige dag toe hulle of geslaap het, of so rusteloos was dat ek heeltyd moes raas.

Ek probeer veruidelik hoe dit werk: die lewe is nie eenvoudig nie. Niemand is net goed of net sleg nie.  Iets waaraan ek myself gedurigdeur moet herinner, maar 'n wysheid wat ook met tyd saam gekom het.  Dis bevrydend om van die alles of niks beginsel losgemaak te wees. Hoe ouer 'n mens word, hoe meer besef jy dat daar wel grys areas in die lewe is.  'n Mens raak meer verdraagsaam met jouself en met ander wanneer jy swakhede ontdek, foute, verkeerde keuses.

Ek wens net ek kan elke dag my eie wyshede toepas...