Gorrelinge oor uitsteeksels

Mei 31, 2013 in Uncategorized

Ek word gisteroggend wakker met ‘n eienaardige gevoel in my gesig.

Toe ek by die spieël verbyloop, sien ek dat my bolip, om een of ander rede, skielik in die nag besluit het om op te swel. Sommer so vanselwers, sonder enige elmbooghou van vroulief of geheimsinnige allergieë van visprodukte of iets. Sommer net.

En dit lyk aardig. Nie ‘n fraaie tuitlip soos Angelina Jolie nie, maar ‘n bona fide hanglip soos ‘n tapir.

Gelukkig het ek nie klasse gehad gister nie, en kon ek nog ‘n ruk by die huis rondhang met die hoop dat die swelling sou sak. Watwou, niks. Ek het later agtergekom dat, as my onderlip ook uitstoot, dit minstens lyk asof ek korrel vir ‘n soen. Min of meer soos oom Connie Mulder kon doen.

In elk geval, ek is toe maar so vort die dag in. Natuurlik het die mooiste meisie in die klas besluit om juis gister haar navorsingstopic met my te kom bespreek. Ek vermoed sy is my kantoor uit met meer vrae as wat sy mee ingekom het.

Teen gisteraan het die swelling gesak en kon ek weer myself in die gesig staar.

Sommer so terloops het dit my laat dink aan ‘n Bybelstudie-eksamen op laerskool, toe ons onsmaaklik baie van jafels met die name Rehabeam, Agab en Rehobeam geleer het. Daar het ek ‘n paar prettige frases teëgekom: “Is dit jy, jou beroerder van Israel?” het een op ‘n slag hoogs ontsteld gesê. Nice, né? Soms wil ek my kinders so aanspreek.

Ook, toe een van die konings nog so wys met sy een arm, bly sy arm net so staan. Sy woorde was vir my so koddig, iets soos: “Bid tog tot jou God dat my arm na my kan terugkeer…”

Ek weet nie of dit nog so geskryf is in die nuwe vertaling nie, maar ek het half simpatie met die jafel gehad toe ek my eie lip gister na my wou laat terugkeer.

 

Vrydagvoer

Februarie 22, 2013 in Uncategorized

‘n Seerower, wreed en geroem
het sy hakkelry probeer verbloem.
“K-korrel!” skree hy,
“V-vuur!” toe daarby –
toe klap die skoot: “B-b-b-boem!”
 
 

Ja oukei. Flou, ek weet. En sorrie, Pedrie.

Van Schuster na Shakespeare

Februarie 13, 2013 in Uncategorized

Dit tref my toe netnou in ‘n vergadering dat ek kwalik langs my neus kan afkyk na Schuster se flieks. Dit was vir my altyd sêd dat sy ‘humor’ so sterk moet staatmaak op menslike liggaamsfunksies. Selfde met Casper de Vries – sy grappies is rêrig nie eintlik snaaks as ‘n mens die taboefaktor van al sy vloekwoorde daaruit sou haal nie.

En hier doen ek presies dieselfde met my limerieke.

Wat my ook so ligweg gepla het, is hoe ek by bestaande grappies moet plagieer vir inhoud om vorm voor te gee, tot dit my weer getref het dat Shakespeare maar min of meer dieselfde ding gedoen het met baie van sy dramas. So, hier is ek nou geskwiez tussen die profane en die goddelike, alles net oor die hogere kuns van limerieke.

Nietemin, en ook nie te veel nie, hier is vandag se poging:

Vir toiletgebruik, sê McKechnie
is twee Rand belegging nie sleg nie.
Maar in die besoek
het hy net gepoep –
dit is mos nie biillik of reg nie!

 

Limerick met ouderdomsbeperking

Februarie 12, 2013 in Uncategorized

Jammer, geen gratuitous violence of sex nie. Net ‘n skurwe woord…

Die kerk was geskok toe oom Fielies Breda
‘n duif op die dak met ‘n “Fokof!” verja.
Die leraar maan gul:
“Sê net “sjoe-sjoe” en hul
sou self gefokof het, Oom moes maar net vra.”

 

Riskante rym

Januarie 25, 2013 in Uncategorized

‘n Goedbedoelende vriendin sê dat my versies te pornografies is. Hierdie is seker nog meer gewaagd:

 
‘n Lustige priester, Ignasie,
leer seuntjies klein van katkisasie.
Hy leer hul veel meer
as bloot sedeleer –
Hy werk nou in Pollsmoorplantasie.
 
 
Op ‘n prent waar Oom Zuma ontbloot is
Sien mens duid’lik dat hy nie ‘n Jood is.
Maar die groot oorlogskreet,
sê die vroue wat weet,
is dat daai ding nie werklik so groot is.
 

Sal julle my in die tronk kom besoek?

 

Die goed is verslawend!

Januarie 24, 2013 in Uncategorized

Verstrooid meng San, koekbakker boerin
‘n paar korrels lood by die roer in.
Maar slegte geluk –
toe Sannatjie buk
toe skiet sy die kat in sy murin.

Ek kan dit nie keer…

Januarie 24, 2013 in Uncategorized

Ou Giep wou ‘n selfoon gesteel het

na hy dit voor sy broek ingestreel het.

sy plan is onthul

toe, voor by die till,

sy knaters “Die Stem” begin speel het.

Vandag se dosis

Januarie 23, 2013 in Uncategorized

Ek het nou finaal besluit om my oor te gee aan ‘n lewe van hogere poësie. Nou kan ek ook saampraat met die grotes – Brenton Breytenbach, G.P van Wyk Louw en Eddie Eckstein.

Verlustig julle dus in die belletrie, die skone taal…

Ou Bertie Eenoog kuier volyt
met whisky en bier en met jolyt
Hy sluk bietjie later
sy glasoog se water –
nou loer daar ‘n oog by sy holyt.

Noga limeriek

Januarie 22, 2013 in Uncategorized

Met moeite het Gerty Versluis

hottentotsgot met ‘n rysmier gekruis

Sy kry toe ‘n gog wat

die nare manier had:

eers bid hy, dan vreet hy jou huis.

 

 

Hoe kry ek enkelspasiëring? Help!

Dankie vir die roem

Januarie 22, 2013 in Uncategorized

Oorweldig deur die sukses van my vorige blog (5 response!) het ek besluit om hierdie suksesroete nogeens te probeer uitbuit met ‘n Limerick. Ongelukkig is dit so ‘n vrek moeilike pad dat ek kwalik meer as een per dag sal kan pleeg!

Nietemin:

Vir jarre en jarre het Koos
Gekla dat sy naam hom laat bloos.
Na vele nagwake
By Binnelandse Sake
Heet die kêrel nou Gert Verdoos.