All the world’s a stage

Februarie 21, 2011 in Sonder kategorie

Ek het Saterdag in ‘n salige gemymer tussen twee wegdommelinge tydens ‘n fliek besef op hoeveel vlakke hierdie gevleuelde woorde waar kan wees.

Oukei, net eers die skande uit die pad uit kry – ek slaap nie gewoonlik in flieks nie (shut up, Sprocket…), maar Saterdag het ek heeloggend klas gegee en die fliek se stoele is heerlik sag.

Nietemin, dit was ‘n Disneyprent, en heel oulik gemaak.

Oukei, nou die tweede skande uit die pad uit kry – ek hou van animasiefilms en ek het my kant gebring deur die ‘King’s speech’ Vrydag te gaan kyk. So, ten spyte van wat my skoonfamilie sê, ek het ‘n diep kant. Êrens.

En nou’t ek vergeet wat ek wou sê.

O ja – die toneelspel.

In die fliek het dit my besonder opgeval hoe veel hulle van geykte aanwensels gebruik maak. Mens kan dit seker uitdrukkingsclichés noem – die trek van die ogies, die skeefdraai van die kop, die plooi van die mondjie, die segswyses wat ‘n mens al in soveel der soveel ander flieks gesien het.

Dit is vir seker nie aangebore hebbelikhede nie. Dit beteken dit moet aangeleer wees, en waar anders as op TV of in flieks? Iemand doen dit die eerste keer, dit is effens snaaks, en voor jy weet het jy ‘n ganse volk wat hulle gesiggie só trek; wat “cool!” sê of wat glo dat bepaalde woorde met juis só ‘n uitdrukking gepaard moet gaan.

Gaan kyk die Rapunzel-Disneyfliek en kyk of dit jou ook pla. Dit het my gekos om slaperig te wees voordat dit my regtig teen die kop geslaan het.

Die Amerikaanse nasie het ‘n parodie van hulleself geword!

Dit het my laat wonder hoe die Amerikaanse filmindustrie ‘n hele wêreld se uitdrukkingswyses deur die jare gevorm het. Mense in ‘n land waar baie Amerikaanse films wys, deel in die wêreldtaal van ooreengekome betekenisse. Ek onthou hoe duister ek self gefrons het as ek by ‘n Clint Eastwood cowboyfilm uitgeloop het. En dis hoekom ander volke so ondeurgrondbaar lyk – hulle is nie deel van hierdie taal nie. Ek onthou hoedat ‘n Sjinese seun in die karateklas my van wes na noord gemoer het omdat ek nie sy uitdrukkings kon lees nie.

Dis hoekom ek ook heeltemal ongemaklik voel by die stil, sterk soort mense. Gee my die Italianers – as jy sy hande vasmaak, beduie hy met sy skouers. Dáár’s nou vir jou ekspressie, met ‘n hoofletter e.

Ek wonder of iemand al ‘n studie van die invloed van Hollywood op ‘n wêreld se gesigsuitdrukkings gemaak het?

24 antwoorde op All the world’s a stage

  1. TS het gesê op Februarie 21, 2011

    Vertel my van die ‘King’s Speech’ asb

  2. Daar is ook een ding wat jy moet onthou, die mense wat die animasieflieks maak studeer vir vier jaar om al daai beweginkies uit hulle kop te leer, en hulle betaal nie bietjie geld om in die disneyblik gecan te word nie

  3. Jy is reg. Ek sien my groen koring se liggaamstaal en gesigsuitdrukkings van kleins af vorm volgens die animasie dvd’s wat hulle oor en oor kyk. Soms amusant, soms ietwat irriterend. Die enigste ligpuntjie is dat hulle dit wel darem hulle eie maak, op ‘n stadium, en hulle eie interpretasies daaroor stempel. En gelukkig is meeste van die animasieflieks se humor relatief ‘gesond’ en soms werklik skerper as wat mens verwag…dit sou vir my eindeloos erger gewees het as my kinders ‘Poena is Koning’of ‘Mollie en Wors’ ‘clones’ geword het.

    (Het jy “Up” gekyk?)

  4. Verstommend hoeveel gevoel en belewenis hulle uit so ‘n skrale gegewe kan kry. Ek wou nie hê die fliek moes ophou nie!

    Die feit dat ons groepie heelpad in die kar huis toe oor die fliek gepraat het spreek ook boekdele.

  5. Ek het ook so besluit. Hulle maak ‘n studie van uitdrukkings om hulle karakters lewe te gee.

  6. Wat? Wat? Vir wat is jy vies?

    Ek wonder of ons ewe kwaad gelyk het in die dae voor Hollywood.

  7. ‘Tuurlik het ek ‘Up’ gekyk! Ek mis nie ‘n move nie…

    En noudat jy dit noem, ek onthou ook van my kinders se ‘pose’e was gebaseer op iets uit Lion King of iets dergeliks.

    Aan die positiewe kant gee dit ‘n mens waarskynlik ‘n wyer repertoire van ekspressie. Ek wonder net in hoe ‘n mate gebruik ons dikwels die aangeleerde ekspressie doelbewus vir effek?

  8. Wes na noord. Oplet, vrou.:-)

    Maar jy moet gaan kyk. ‘n Mens mis iets van die magic as jy ‘n Disney laat verbygaan.

  9. “Feeling lucky, punk?”

    (Ek dinky soms ou Al Pacino is bietjie ‘n parodie van homself.)

    Het gisteraand aan die slaap geraak tydens ‘Holy Smoke” op DVD.
    Hou van Harvey Keitel en Kate Winslett as akteurs… maar die vibe van die fliek het my baie irritteer. Anyway, I digress…
    Groete.

  10. Dankie, Wynvlieg!

  11. Ja, ek dink nie Al Pacino sal maklik iets anders as Al Pacino kan speel nie.

    Ek hou ook van Kate Winslett. Hou nie baie van Meryl Streep nie – dis asof sy te bewustelik poog om briljant te wees.

  12. great geskryf

  13. Stem saam oor Streep.

  14. UNPOCO het gesê op Februarie 22, 2011

    Haai, maar die Sjinese het skaars gesigs-uitdrukkings. Ek neem jou dus nie kwalik as jy niks waargeneem het nie. En tussen my en jou…. ek hou ook van animasie flieks. Sal altyd!

  15. UNPOCO het gesê op Februarie 22, 2011

    Jis Murphy, ek sien die anderdag vir John Travolta op Oprah en skrik amper toe ek sien hoe mismaak hy al lyk. Kan hulle nie agterkom die snykunde maak hulle leliker in plaas van mooier nie? Pleks hulle maar net waardig oud word.

  16. Dit is nogal ‘n skerp waarneming van jou die! Ek het nog nooit voorheen so daaraan gedink of dit werklik opgelet nie, maar kan nou nogal vinnig dink aan ‘n paar van die animasie-flieks met ge-ykte gesigsuitdrukkings…
    En ek hou ook van animasie-flieks.. Het destyds my gesonde en ongesonde kwota daarvan ingekry gedurende die wintersmaande by die kleuterskool waar ek gewerk het, maar dit het ‘n liefde gebly.. ek dink deels omdat dit oor die jare verander het.. daar word soveel skerp kwinkslae ingewerk wat ‘cater’ vir die volwassenes en die kinders wat daarna kyk.. Shrek was nogal vir my ‘n gunsteling! xx

  17. ‘n Mens verloor die vermoë om juis uitdrukking te wys. Botox en ‘n stywe vel!

  18. baie dankie, Pruimtwak

  19. Ek het self ‘n paar gemaak met my Super 8 kamera. Weet nie waar ek die geduld gekry het nie!

  20. Ek dink die Britte het relatief minder segswyses en uitdrukkings die wêreld ingedra. Dalk omdat die Amerikaners soveel meer ekspressief is.

  21. Ek stem saam – die moderne flieks is baie meer vermaaklik oor ‘n wye spektrum ouderdomme. Dit werk vir my!

  22. FOXY1975 het gesê op Maart 3, 2011

    😉

  23. Skerp…baie skerp!…maar ons doen dieselfde…kyk maar net na 7de Laan… gesiggie trek …altyd!

Laat 'n Antwoord

Jou e-posadres sal nie gepubliseer word nie. Vereiste velde word aangedui as *.