Dankie Olaf Andresen

Oktober 2, 2009 in Sonder kategorie

Dis ook maar seker nog ‘n herinnering wat sou vergaan, my stukkie geskiedenis saam met die komponis Olaf Andresen. Maar dis vir my te spesiaal.

As jy nie onthou nie, Andresen het die Heidelied geskryf, en “My hart verlang na die Boland”. Hy kon besondere lirieke en mooi melodieë voorttower en het ook ‘n paar Afrikaanse operettes geskryf. Kyk hoe mooi:

In die bloute sweef ‘n leeurik

sing sy liedjie wonderbaar

bring sy hulde aan die heide

groete aan die wandelaar…

In die vroeë sestigerjare het my ouboet en ousus opgetree in ‘Die Heidenooientjie’ wat deur hulle hoërskool in Meyerton opgevoer is. Toe, later, het my pa se laerskool Andresen se ‘Die Mieliefeetjie’ opgevoer. Ek het self ‘n rolletjie daarin vertolk, gelukkig nie as feetjie nie.

Die operette het Andresen in ons huis gebring. En, wat ‘n besondere, entoesiastiese mens was hy nie. Seker deur hulle gedeelde liefde vir musiek en sang, en miskien selfs duistere ou Afrikanerassosiasies (Andresen was oorspronklik ‘n Duitser, maar het hom in die oorlogsjare met die Afrikanersaak vereenselwig), het die twee dadelik goed oor die weg gekom. Hy het ‘n paar keer by ons kom kuier en dit het dikwels ontaard in ‘n gesingery.

Dit het ons plattelanders ook ‘n smakie gegee van die ryk Johannesburg-voorstadslewe, toe ons ‘n slag uitgenooi is na Andresen se verjaarsdagviering. Ons laaities het ons vergaap aan die ruim tuin, die liggies, die dik rooi tapyte en die statige trappe. Hy het self sy musiek in die huis gedruk en gepubliseer. Eenkant in ‘n skemerige filmateljee het die Three Stooges knetterend vertoon om ons portiergroep te vermaak.

Daardie aand het Andresen ‘n musiekstuk in my hand gestop, dit geteken en kastig aan my opgedra. Ek vermoed dis maar omdat die grootmense so lekker gekuier geraak het, maar ek koester daai stuk vandag nog.

Dit is seker ook permanent verlore, maar hy het ook vir my pa die pragtige melodie van die laerskool se skoollied geskryf. Tensy dit in Sotho vertaal is, is ek seker die Laerskool De Deur sing nie meer die lied nie. Dit bly nog net sing in die harte van ‘n era se kinders wat ook ‘n smakie van grootsheid kon deel.

9 antwoorde op Dankie Olaf Andresen

  1. icysparx het gesê op Oktober 2, 2009

    Naand, vriend. Jy deel ‘n ding darem goed, hoor.

  2. katrina het gesê op Oktober 2, 2009

    Mooi herinneringe! En baie spesiaal. Die Heidelied is mooi en ek is bly om te hoor dis nie net ‘n blote vertaling van ‘n Duitse of Hollandse liedjie soos so baie ander nie.

  3. Janklaas het gesê op Oktober 2, 2009

    Haai daar. Jammer, ek het gisteraand ge’fade’ na ek hier geskryf het.

  4. Janklaas het gesê op Oktober 2, 2009

    Is so. Ek onthou hoe beswaard ek was toe ek besef het hoeveel van die liedjies in ons eie FAK-boek kom nie eers van hier af nie. Praat van ‘n holle oorwinning…

  5. Janklaas het gesê op Oktober 2, 2009

    Ja. Ek verstaan nie die idioom te mooi nie, maar ek dink dis hier gepas: Hoe kaler jonker, hoe groter pronker (of hoe stouter in die donker).

  6. Janklaas het gesê op Oktober 3, 2009

    Dankie, Ghaap.

    Jy praat woorde wat ek nie verstaan nie. Sideview?

  7. Janklaas het gesê op Oktober 3, 2009

    O, oukei, ek sal bietjie daar gaan rondkyk.

  8. Janklaas het gesê op Oktober 5, 2009

    Daar was ‘n paar mooi liedjies in die operette wat seker nou verlore sal gaan. Maar ek is bly jy kon die herinnering deel.

  9. Ek lees dat jou vader opgetree het in die Mieliefeetjie toe hy op laerskool was. Ek sal graag meer wil weet want ek was in Simmer Deep L/skool in 1961/62 toe die Mieliefeetjie in Germiston se stadsaal opgevoer was en was een van die kabouters (Vabond).
    Het nog koerant knipsels en al die name van die opvoering. Gooi ‘n lyn na my e-pos (vanwyk.aj@vodamail.co.za. / 0826285642…
    Albert

Laat 'n Antwoord

Jou e-posadres sal nie gepubliseer word nie. Vereiste velde word aangedui as *.