by

Madeleine van Biljon sterf

Februarie 24, 2010 in Sonder kategorie

Die Burger berig vanoggend dat Madeleine van Biljon oorlede is.

Wat ’n verlies vir ons taal en kultuur, maar hoe dankbaar moet ons nie wees vir wat sy gedoen het nie.

Sy was ’n vermaarde joernalis en was baie nouer betrokke in ons letterkunde as wat mense besef. Madeleine Van Biljon se Oumaboek, Merely Madeleine en Geliefde leesgoed het, onder andere, uit haar pen verskyn. Sy en haar sus, Cecile Cilliers, was die “boeksusters” wat letterkunde onder TV-kykers se aandag gebring het. As vertaler het sy Deon Meyer en Marita van der Vyver aan die Engelse wêreld blootgestel.

Van Biljon was ook ’n koskenner en het lank vir die Sunday Times ’n kosrubriek behartig. Haar dogter, ook Madeleine, het dié streep oorgeneem en skryf as Nettie Pikeur.

Wat ek egter van haar onthou was dat sy reguit en eerlik was. In 1998 het daar ’n moerse herrie om haar kop losgebars toe Maretha Maartens haar gevra om vir Finesse te vertel hoekom sy nie ’n Christen is nie. Die arme Afrikaanse gemeenskappie aan die voet van Afrika is só geskud deur ’n gelyktalige suster wat bereid was om eerlik te wees, dat hulle die hoof van die ATKV-Dames afgevaardig het om ’n prys wat aan Madeleine oorhandig is vir haar werk in Afrikaans, te gaan terug vra. Alice Maartens, toentertyd president van die ATKV-Dames, het sommer self op haar koekvurkie geklim en die prys gaan terugvra. Sê Alice in Afrikaanse Wonderland toe dat Afrikaans en die Christendom onlosmaaklik een is en dat Madeleine dus asseblief die prys moet teruggee.

Nou ja. Selfs die feit dat Fritz Kok (grootbaas van die ATKV) en Hennie de Wet (destyds die hoof-uitvoerendebeampte van die FAK) tot Madeleine van Biljon se redding probeer kom het, kon nie die susters met hulle koekvurkies keer nie.

Die onchristelike Van Biljon Bastille is bestorm en vol roomkoekies gemors. Sies!

Nou ja.

Gegroet, Madeleine. Jou nagedagtenis leef voort!

10 antwoorde op Madeleine van Biljon sterf

  1. Madeleine van Biljon was n Groot Gees.

    Wat die debakel met die Afrikaanse TwakKots Vereniging betref- goddank ons is nie almal so nie…

  2. Dis jammer. Ek het nie geweet van die prys terugvat nie.
    Onnosele skynheilige helsems!

  3. ‘n Ongelooflike verlies. Gelukkig is haar werk ‘n onskatbare bydrae wat ons ter herinnering mag behou.

  4. veralda het gesê op Maart 1, 2010

    ek is ‘n groot fan van Madeleine. Dankie hiervoor.

  5. Izakdv het gesê op Maart 8, 2010

    Indeed, Cindy!

  6. Izakdv het gesê op Maart 8, 2010

    Goeie antwoord, Joe

  7. Izakdv het gesê op Maart 8, 2010

    Ek sou ook kwaad gewees het, Annemari

  8. Izakdv het gesê op Maart 8, 2010

    Ja, dis al ‘n rukkie gelede, Henry

  9. Izakdv het gesê op Maart 8, 2010

    Dis waar, DK!

  10. Izakdv het gesê op Maart 8, 2010

    Plesier, Poppie

Laat 'n Antwoord

Jou e-posadres sal nie gepubliseer word nie. Vereiste velde word aangedui as *.