Augustus se DinkNet-essay: Desmond Painter oor taal en die volkslied

Augustus 21, 2009 in Sonder kategorie

As deel van my nuwe betrokkenheid by LitNet, het ek, naas die vul van hierdie blog met my eie gedagtes, onder meer die voorreg om elke maand, ter bevordering van intellektuele gesprekvoering in Afrikaans, ‘n essay deur ‘n skrywer van my keuse te kan “inkoop”. Die eerste maandelikse DinkNet-essay, wat pas in die Seminaarkamer verskyn het, getitel “Hoe vertaalbaar is ‘n volkslied? Enkele gedagtes oor taal, burgerskap en sosiale identiteit”, is deur Desmond Painter, ‘n dosent in sosiale sielkunde aan die Universiteit Stellenbosch. Mense wat daarop wil reageer, kan dit op SêNet of sommer op hierdie blog doen, sodat die gesprek kan voortgaan.

Self dink ek Desmond roer ‘n baie belangrike saak aan, naamlik of iets soos ‘n gasvrye nasionaliteit denkbaar is. ‘n Kritiese vraag sou dan wees: Is nasionaliteit nie onvermydelik ‘n uitsluitende begrip nie? Moet burgerskap hoegenaamd met verwysing na nasionaliteit, wat gewoonlik ‘n identiteitsbegrip is, bedink word? Desmond lyk te suggereer dat iets soos ‘n “apofatiese” nasionaliteit (om ‘n teologiese term te gebruik) dalk die antwoord is: ‘n nasionale identiteit wat nie in taal omskryf kan word nie omdat dit, heel bewustelik, geen etniese, talige, godsdienstige of ander essensie het nie, maar juis deur sy radikale openheid gedefinieer word. Daarmee dekonstrueer hy eintlik nasionaliteit as sodanig, iets waarvan ek baie hou. Hy het ook gelyk wanneer hy die belang van taal in die herdink van nasionaliteit na vore bring. Hoe ‘n staat met die tale in sy gebied (daar is nooit net een nie) omgaan, verraai baie oor hoe nasionale identiteit in daardie staat gekonstrueer word, en oor die mate waarin die staat as gasvry, ook teenoor sy eie burgers, beskryf kan word.

2 antwoorde op Augustus se DinkNet-essay: Desmond Painter oor taal en die volkslied

  1. baie interessante artikel….fassinerende gedagte…..volkslied sonder woorde…..maar het die soort musiek/styl musiek nie dalk ook baie implikasies nie, en kommunikeer dalk net so hard en duidelik soos die lirieke? wonder maar net…….

  2. Jy bedoel ons moet pasop vir ‘n volkslied wat of so monokultureel is dat dit die probleem vererger, of so multikultureel dat dit aan ‘n soort Freddy Mercury-kitsch (Bohemian Rapsody) begin grens? Volgende voorstel dus: Wat van, in plaas van ‘n volkslied, ‘n volkstilte? Of ‘n volks- “free for all”, ‘n volkskakefonie? Dit raak interessant!

Laat 'n Antwoord

Jou e-posadres sal nie gepubliseer word nie. Vereiste velde word aangedui as *.