Kampvegter vir katte – vir Henry en Tina

Augustus 10, 2013 in Uncategorized

Katte het my al veel vreugde besorg. So ‘n jaar terug was ‘n wilde wit kat wat op die dakke van ons kompleks gewoon het, die aanleiding tot my ontmoeting met iemand wat ek grensloos bewonder en in wie se geselskap ek my verlustig.

‘n Buurvrou wat ook vir katte omgee, het vir M ingeroep om die kat vir ons te kom vang. Ons wis die kat se naam is Snowy – haar vorige baas het haar ten einde raad net hier laat agterbly, nadat hy haar glad nie gevang kon kry toe hy trek nie. Sommer gou-gou het M haar in ‘n spesiale vanghok ingelok, sodat ek die vuil wit kat met die soetskeel olyfgroen oë drie dae lank in my huisie kon aanhou om haar te laat verstaan dat dít nou ook háár nuwe huis is.

Die wilde wit kat (Snowy > Spokie > Terr’blanche > Terr > Pangar) sit hier by my voete en spin – heeltemal verhuislik. Sy en my ‘familiar’, Skoonlief, verduur mekaar, met ‘n onder-onsie so nou en dan as Pangar haar te veel aanmatig. Smiddae kom begroet sy my by die kar, staan op haar agterpote en druk haar koppie onder my hand in om te vertel hoe bly sy is om my te sien.

Vandag was ek bevoorreg om ‘n kruistog saam met M te beleef. Op my skoondogter se versoek, het M drie gemmerkatjies kom vang op die bouperseel van ‘n nuwe kerk, sodat ons ’n intelery kan keer en nóg katjies sonder heenkome kan voorkom. M se gereedskap is eenvoudig en effektief: ‘n spesiaal-gemaakte vanghok, ‘n lepel en ‘n blikkie vis. Die hok het ‘n deur wat boontoe oopmaak, met ’n slim meganisme wat dit laat toeklap as die kat se volle gewig op die vloer daarbinne druk. M pak ‘n spoortjie vis tot by die vol kosbakkie agterin die hok; ‘n hawelose, honger kat word met hierdie tegniek – en baie geduld – keer op keer vasgetrek.

Dis vir haar swaar om te sien hoe ontsteld die katte raak as hulle gevang is: “Hulle spring so op en af. Maar as die hok met ‘n kombersie toegegooi is, raak hulle kalmer. Dan laai ek hulle in die kar en sit Classic FM aan en ek vra heeltyd askiesie, askiesie en belowe alles sal reg wees. As jy uiteindelik so ‘n kat vrygelaat het en jy sien hoe word hy vetter en makker – dis ‘n wonderlike gevoel van hier het jy ‘n dier gehelp…Jy stap maar die tweede myl met die kat…”

M ken veeartse wat die katte vir haar teen kosprys steriliseer. Dan knip hulle die puntjie van die een oor af, sodat mense kan weet die kat is ‘reggemaak’. Dieselfde dag nog word die kat in sy habitat teruggesit – en dan word hierdie kat M se verantwoordelikheid. Die skraal, gedrewe vrou met die mooi blou oë en die sagte hart gun haarself geen rus nie. Dinsdae en Vrydae voer sy kolonies katte – in Sunnyside, Arcadia, die middestad, Centurion, by Weskoppies… Sy ken al die ander engele wat bereid is om hierdie werk te doen en sy snuffel mense uit wat klein katjies sosialiseer totdat daar ‘n huis vir hulle gevind word. (Op drie maande word klein katjies nie meer maklik mak gemaak nie, jy moet hulle so op twee maande by iemand geplaas kry, anders bly hulle wild.)  Sy prys die sekuriteitswagte wat na die katte in hulle omgewing omsien; sy pleit met woonstelopsigters om haar tog toe te laat om die plankmaer katte kos te gee. In haar motorhuis gaar sy winskopies in katkos op, sy kook rys en meng dit met “pet’s mince” en een of twee blikkies katkos. Sy sê mens moet ook sorg vir verskeidenheid – “tot ‘n veldkat raak lekkerbekkig!”

Ons kon vandag net een katjie gevang kry – daar is drie – die allerliefste, mooiste wyfie-gemmerkatjie. Sy is laat vanmiddag teruggeneem na waar sy bly, met ‘n sagte bedjie en ‘n hele houer katkos. Ek weet M sal sorg dat die ander twee ook gesteriliseer word, want sy is ‘n verbete kampvegter vir hierdie diere. Sy is dalk ‘n onwaarskynlike engel, hierdie vrou met die vanghok en die blikkie vis, maar ‘n engel is sy gewis.

 

11 antwoorde op Kampvegter vir katte – vir Henry en Tina

  1. tina10 het gesê op Augustus 11, 2013

    Ag dis spesiaal Ek gee ook mos so vir die katte kos en is ook bekommerd oor ek binne kort gaan trek. Gelukkig weet ek daar is mense wat kos gee in die omgewing R
    Ek is is net bekommerd oor die gryse wat hoofsaaklik in my erf woon.Ek is meer as bewus van die oorbevolking maar my hart word sag…

  2. Elke mens moet net uitvind watse tipe engel hy is. Ek sou graag een wees wat net mense se hartseer wil wegneem en hulle vry maak van siek regerings, banke en die regs stelsel.

  3. Ek is ook mal oor katte! Julle doen goeie werk! Doe zo voort!

  4. Jis dis nou nice – net mooi die teenoorgestelde van die wetters wat sommer hulle katte weggoi as hulle met vakansie weggaan.

  5. ek is ook ‘n katmens, sit egter met huismense wat hiper allergies is vir kathare!

  6. Ek haal my hoed vir haar af…ek het drie huiskatte en twee plaas katte (plus tenminste een wilde gemmerkat wat saam met die plaaskatte kom eet…) en ek reken ek het n onbenydenswaardige weeklikse katkosrekening! en omdat ek die groooooooot fout gemaak het om bietjie te lank te wag met die sterilisasies van ons eerste twee wyfiekatte, het ek uiteindelik betaal vir sterilisering van nog agt katte voor ek vir hulle huise gekry het. (nie kosprys nie )-; )
    En kieskeurig ! Beslis ja. die naweek by die plaas gee ek stukkies beeslewer vir die twee redelik ‘spartane’ stoorkatte…die een kon nie genoeg kry nie terwyl die andere ene net stert innie lug weggeloop het daarvan…

  7. M doen goeie werk

    die Katdame van Ptown

  8. Great acts are made up with small deeds 🙂

  9. Ek bewonder sulke mense!Dis maklik om te praat,maar om te doen is die regte ding.

  10. Sjoe,dis ‘n mooi storie.Gelukkig kan hierdie katte sorg dat die rotte en muise beheer word.

  11. Jy maak ‘n groot verskil. Ai, dit bly maar die mense wat trek sonder hulle katte, hier by ons gaan dit dieselfde en daardie katte kom baklei dan in my erf met my katte. Hoe kan mens so hok maak, maak dit blyk die enigste manier te wees om die katte te vang en dan na ‘n veilige hawe te neem.

Los ’n antwoord vir Zeppie - @zephur. Kanselleer antwoord

Jou e-posadres sal nie gepubliseer word nie. Vereiste velde word aangedui as *.