Flori en Koelsem se kosse sonder grense

January 26, 2017 in Uncategorized

_MG_1792

Op 26 Januarie was Koelsoem Kamalie en Flori Schrikker in die RSG-ateljee in Seepunt met borde vol koeksisters en koesisters.

Tannie Koelsoem en tannie Flori het die verskille tussen die boerekoeksister en die Maleikoeksister verduidelik.

Tradisioneel word die Maleikoeksister (ook bekend as ’n koesister) met meer speserye aangemaak, dan as bolle in diep olie gebak, in warm stroop gegooi en daarna met klapper bestrooi.

Die boerekoeksister se deeg word gevleg, in olie gebak en dan in yskoue stroop gegooi.

Tannie Koelsoem vertel die Maleikoeksister kom uit die dae toe die slawe nie hulle geloof openlik mog bedryf nie. Toe het hulle liedjies gemaak om saam te sing in gebed terwyl hulle brooddeeg versoet het en uitgedeel het, dan het die base gedink hulle hou partytjie.

_MG_1824

Ook in die ateljee was Piet Huysentruyt, ’n Michelin sjef uit België.

Piet Huysentruyt, wat soos Flori en Koelsoem ’n Garmound-wenner is, sê hy het slaptjips (hulle noem dit frieten) kom maak, want hy wil die nosie dat tjip van Frankryk kom, heeltemal verwerp. Dit was die Engelse wat van French Fries begin praat het – tjips kom van België.

Die gesprek in Radio Sonder Grense se ateljee was werklik sonder grense, want saam met Martelize Brink en Johan Rademan, was Anja Daems van Radio 2, ’n Vlaamse stasie. Die gesprek, wat in Vlaams en Afrikaans gevoer is, is toe ook in België uitgesaai, en natuurlik op die internet.

_MG_1829

Stef Bos het vir Churchill Naudé genooi en hulle het saam-saam in Afrikaans en Nederlands gesing.

Stef sê vir hom is dit belangrik om saam te werk, want in die VSA, Engeland en Europa sien ons al hoe meer hoe mense hulle self wil afsonder. Hy wil juis die grense afbreek. Die tale wat gemeng het en oor landsgrense heen uitgesaai is, was dus simbolies.

Die uitsending was pret, maar die boodskap van saam eet, as Moslem en Christen en ongelowige, Belge en Suid-Afrikaners, veelrassig, veeltalig en gelukkig, was ’n baie belangrike metafoor.

soettand

Tannie Flori en tannie Koelsoem se tweede boek, Soettand, verskyn einde Februarie. Die titel sê dit alles, nie waar nie? Verskeie ou poedings wat tradisioneel is van ons gemengde Afrikaanse komvandaan, kom hierin voor.

Soettand word weer deur LAPA uitgegee met die ondersteuning van die ATKV.

Leave a reply

Your email address will not be published. Required fields are marked *

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>