Die onderduikers van die jaar

December 16, 2015 in Uncategorized

Ek wil gou oor twee boeke praat wat stink resensies gekry het hierdie jaar en toe verdwyn het. Albei verdien egter ‘n tweede kans.

 

Die dag van die Lord, Johan Kruger

die dag van die lord johan kruger

Hier is die spioenasieroman van die jaar. Wat meer is, die feite waarop hierdie boek gebaseer is, is nog interessanter as die romangegewe. Net soos Irma Joubert se Immer Wes, help hierdie boek die leser om die oorlog te verstaan. Beide skrywers doen dit deur die verskrikking van die oorlog vir ons weer te gee deur die oë van ‘n kind.

Lesers wat Irma Joubert se verhale geniet, moet beslis Die dag van die Lord oorweeg. Moenie dat onopgeleide resensente julle afsit nie.

Ek wil egter een punt noem: Irma “misbruik” die feite, maar verander hulle nie. Johan wangle so ‘n paar datums (hy doen dit openlik). Ek het nie gedink dis nodig nie, maar dit doen geen afbreuk aan die storie nie. Net soos Joubert, stel Kruger ‘n mens bekend aan historiese feite wat soms so vergesog is, dat jy nooit kan dink dis waar nie. Dan begin jy lees en… nou, ja. Lees self. Hulle is dan waar!

Fritz Joubert Duquesne is waaragtig een van die interessantste karakters wat ek onlangs in enige boek raakgeloop het. Die feit dat hierdie man ‘n ware persoon uit ons eie land is, wel, dit is gewoon verstommend. Geskiedenisliefhebbers moet Die dag van die Lord lees bloot om sy, ware, bydrae tot die geskiedenis raak te loop.

Die hoofkarakter in die boek is egter Andries Fourie van Bethal, ‘n jong seun wat alles verloor weens Kitchener se barbaarse oorlogbeleid. Hy oorleef, ten spyte van bittere beproewings, maar hy dra ‘n wrok in hom teen Kitchener wat uiteindelik sy hele lewe bepaal.

Wanneer Andries dan ‘n kans kry om na Engeland te gaan om hom as regsgeleerde te kwalifiseer, word ‘n ontmoeting tussen hom en Duquesne gereël.

Duquesne moedig Fourie aan om homself so diep as moontlik in die Engelse psige in te grawe sodat hy in Kitchener se binnekring kan kom.

Vandaar vervleg die feit en fiksie heerlik. Die historiese feite is blerrie interessant, maar wat die boek vir my laat uitstaan, is dat Kruger dit regkry om Fourie se interne struwelinge uit te beeld.

Die meeste goeie spioene word uiteindelik in twee geskeur tussen hulle eie missie en die sienings van die vyand, want om die vyand te verstaan, moet jy een word met hulle. Kruger beeld dit meesterlik uit.

Wanneer Fourie boonop verlief raak op ‘n Engelse meisie, dan loop dinge regtig rof vir hom. Wanneer die Boerespioen, die ware figuur Johanna Van Warmelo, boonop vir hom waarsku dat wraak nie noodwendig ‘n goeie ding is nie, wroeg die arme man werklik. Teen daardie tyd is hy egter reeds so diep ingegrawe dat dit bitter moeilik sal wees om om te draai.

 

‘n Lekkerleesroman par excellence

Ek weet nie hoekom daar so min spioenasieromans in Afrikaans geskryf word nie, dalk omdat dit so moeilik is om die psige van die spioen uit te beeld.

Die dag van die Lord is ‘n lekkerleesroman wat baie goed nagevors is en vul ‘n deeltjie van daardie spioenasievakuum in ons lekkerleesmark.

Wilna Adriaanse se Dubbelspel raak natuurlik ook dié genre aan, en ‘n mens moet ook Bets Smit se twee romans, Onder ‘n sterrehemel en Goue dagbreek noem. Vir ‘n oorsig oor Johanna Van Warmelo betrokkenheid by Smit se Onder ‘n sterrehemel, kan julle hier kliek.

Lesers wat Kerneels Breytenbach se Ester geniet het, sal ook Die dag van die Lord geniet.

 

Koop Die dag van die Lord

Johan Kruger is ‘n gewikste skrywer. Sy roman, Die vloek, was ‘n fantastiese teks. Met Die dag van die Lord lewer hy egter ‘n besonder lekker toetrede tot lekkerleesboeke. Ek hoop hy hou aan skryf.

Die dag van die Lord is deur Umuzi uitgegee. Daar is goed wat ék anders sou doen, maar dit neem nie die genot van die storie weg nie. Koop dit. Dit is besonder goed en lees baie lekker. Boonop is die feit dat ek vir Fritz Joubert Duquesne ontmoet het, ‘n baie groot pluspunt. As jy van geskiedenis hou, koop hierdie boek.

 

Kodenaam Icarus, Henk Breytenbach

Kodenaam-Icarus-Henk-Breytenbach

In  my jonger dae het ek soms cowboyboekies gelees en my groot held as pikkie was Fritz Deelman. Juis omdat ek hierdie sagtefiksie leer verslind het, kon ek later my tande in moeiliker werk slaan. Vandag sien ek kans vir baie moeilike boeke, maar as ek nie maklik begin het nie, sou ek nooit verder gekom het nie.

Ek het ook onlangs ‘n vriendin oortuig om Chanette Paul se Offerlam te lees. Sy wou nie, want sy hou nie van moeilike boeke nie. Ek het haar egter makliker boeke laat lees en haar toe oortuig dat meer verwikkelde boeke nie moeilik is nie. Sy het Chanette toe gelees, en was mal oor Offerlam. Dit is hoekom boeke soos Kodenaam Icarus so ongelooflike belangrik is in ons arsenaal teen alles wat in lees se pad staan.

Kodenaam Icarus toon groot ooreenkomste met Chris Karsten se enorme boek ‘n Man van min belang. Ek was gek oor Karsten se boek, maar ons moet eerlik wees dat dit moeilik lees. Ons gaan nie jong mense, of diegene wat bang is vir lees, oorhaal tot die BOEK as ons Karsten se roman in hulle hand stop nie. Gee vir hulle Kodenaam Icarus.

Kodenaam Icarus lees lekker en vinnig. Vic Nel is was ‘n veiligheidspolisieman in die ou bestel. Sy demone dryf hom ondergronds. Wanneer ons hom ontmoet, is hy ‘n persona non grata. Hy het verdwyn… Dan, heel per ongeluk beland sy vingerafdrukke op ‘n moordtoneel en al sy ou hanteerders soek hom weer.

Vic moet weer weer begin vlug, en dan dans die poppe behoorlik.

Ek wil eintlik nie te veel weggee van die storie nie. Daar is pragtige, poedelkaal, meisies wat agter Vic skuil teen die bose en later kry ou Vic darem ook ‘n lekkie in die valleie van genot, gelukkige bliksem.

Wat ek wel kan noem is dat daar ‘n korrupte president in die boek is. Sy naam is Jacob. Ek wonder of iemand anders ook sou wou roep #ZumaMustFall ná hulle Vic se storie gelees het?

 

Maklik is nie vlak nie

Ek was mal oor François Smit se dôners moeilike Kamphoer, maar dit is omdat ek leer lees het op Fritz Deelman.

Ek sal Kodenaam Icarus beslis vir my seun van dertien aanbeveel. Wie weet, as hy nou hierdie een geniet, kan ek hom oor ‘n paar jaar dalk bekendstel aan Karsten se ‘n Man van min belang.

Soos soveel goeie lekkerleesboeke is Henk Breytenbach se boek nie vlak nie. Die navorsing oor post-traumatiese stres laat my baie sterk dink aan die ware verhale in Elaine Bing se Ek het gemartel. Vic Nel is ‘n gekwelde siel. Daar is onskuldige bloed aan sy hande en klaarblyklik het hy nie meer veel gevoel in sy hart nie, tot ‘n mooi meisie vir hom meer as lyf word. Elaine Bing se boek handel oor ware mense wat presies daardie paadjie geloop het.

 

Koop Kodenaam Icarus

As jy soek na ‘n boek wat lekker en vinnig gelees kan word deur mense wat nie wil sukkel nie, hier is dit.

Vir meisies is daar elke maand vier boeke in die Romanza-klub. Wat is daar vir seuns? Gooi Kodenaam Icarus in hulle kerskous. Dit is deur LAPA Uitgewers uitgegee.

Selfs boeksnobs mag dit maar lees, steek dan maar Kodenaam Icarus weg in een van Tolstoi se omslae. Jou vriende sal beïndruk wees, en jy sal ‘n naelbytstryd hê met die horlosie.

Ek het dit gelees. Ek is nie ‘n snob nie. Ek hou van boeke, maklik en moeilik. My liefde vir boeke het juis by hierdie soort boek begin.

Leave a reply

Your email address will not be published. Required fields are marked *