Profile photo of crito

by

Slordig

November 15, 2017 in Uncategorized

Crito sit in die vreemde en sukkel om sin te maak uit die worpelinge van die internet. Ek lees Cas van Rensburg se resensie (vir Boeke24) van Koms van die motman, die nuwe roman van Chris Karsten, op die webwerf van Netwerk24. Die inleiding wil net nie vir my lekker werk nie. Dan maar na die e-koerant, en a-ha! Tussen die papierkoerant en die webwerf, as mens dit so kan stel, het die eerste paragraaf weggeval. Weliswaar ’n eenwoord-paragraaf, maar dis nie die punt nie.

Die punt is dat sulke dinge nie moet gebeur nie. Dis slordig. En irriterend. En as Crito in die vreemde sit, maak so iets hom nie regtig lus om die resensie verder te lees nie. Al is dit geskryf deur Cas van Rensburg.

Volgende aan die beurt is Joan Hambidge, wat vir Boeke24 skryf oor De Waal Venter se digbundel Oop sirkel. Soos gebruiklik verskyn die inligting oor die boek waaroor dit gaan heelbo: “Oop sirkel. De Waal Venter. NALEDI, R175.” En dan die eerste paragraaf van die resensie: “De Waal Venter se bundel Oop sirkel het onlangs by Naledi verskyn.”

Sloridge begin. Tweede paragraaf: “Vorige tekste is Kiem, Pols en Klawer (saam met D.P.M. Botes en Menno Stenvert).”

Crito kry die boodskap. Hambidge is nie deur die bundel geïnspireer om ’n behoorlike inleiding vir die resensie te prakseer nie. Gaan dan maar verby.

Jan-Jan Joubert skryf in Rapport Boeke oor Karel Schoeman se Skepelinge: Aanloop tot ’n roman. Begin met ’n vervorming van ’n gedig van Jan F.E. Celliers, en dan val hy behoorlik weg met “Enigeen wat, soos ek, meen Karel Schoeman is die beste skrywer wat Afrikaans nog voortgebring het, sal saamstem dat Skepelinge sy meesterskap bevestig.”

Wat?! Hoe nou gemaak as jy onder die geledere tel van hulle wat dink dat N.P. van Wyk Louw of Breyten Breytenbach is die grootste skrywer wat Afrikaans nog voortgebring het?

Dit was ’n slegte week vir inleidende paragrawe.

2 antwoorde op Slordig

  1. Mens kan aan verskeie redes dink waarom Joan Hambidge die resensie van “Oop sirkel” op daardie spesifieke manier geskryf het. Dalk was sy baie haastig. Mense soos sy het baie mielies op hulle vurk. Miskien hou sy nie van oranje-rooi (die omslag) nie. Dalk het sy te veel outydse woorde raakgelees. Of het sy miskien net ‘n hekel aan poësie wat in die Transvaal geskryf is? Mens kan haar darem prys vir ‘n paar dinge: geen spelfoute nie. Ook nie taalfoute nie. Al die sinne eindig met ‘n punt. Daar is altyd ‘n positiewe kant. Mens moet regverdig wees.

  2. Nee Crito, Joan se intro is glad nie slordig nie. Dit is nie “soos gebruiklik” nie; die inligting oor die boek kan oornag deur die subs rondgeskuif word en as jy vir verskillende publikasies skryf verander dit volgens hul styl. Niks is staties by ‘n koerant wat ook aanlyn gelees kan word nie. Tussen die lepel en die mond val die pap op die grond, as resensent het jy geen idee hoe die resensie gaan lyk nie. Selfs al verskyn dit gereeld in ‘n voorspelbare vorm of “template”. Dit was puntenerig van jou om so iets te noem, up your game. Come on.

    “Volgende aan die beurt is Joan Hambidge, wat vir Boeke24 skryf oor De Waal Venter se digbundel Oop sirkel. Soos gebruiklik verskyn die inligting oor die boek waaroor dit gaan heelbo: “Oop sirkel. De Waal Venter. NALEDI, R175.” En dan die eerste paragraaf van die resensie: “De Waal Venter se bundel Oop sirkel het onlangs by Naledi verskyn.”

Laat 'n Antwoord

Jou e-posadres sal nie gepubliseer word nie. Vereiste velde word aangedui as *.