You are browsing the archive for 2013 July.

Watter aap bly nog monogaam?

July 30, 2013 in Geen Kategorie

Adam soek sy ribbebeen, Dopper Joris sy seiltjie, die voëltjie sy nes (“Hebban olla vogala …”). Maar as die pot sy deksel gekry het, wat gebeur daarna? Elke week wonder die mense op LitNet se biegruimte hieroor. En toe lees ek gister die volgende artikel in die Guardian: “The mystery of monogamy: scientists claim to have the answer. Study says some species have become monogamous through evolution and, for primates, infanticide is at its root.”

Nogal interessant dat die wetenskaplikes paartjies se getrouwees aan mekaar sterk koppel aan ouerskap. Die negatiewe soort. Maar die afwykende soort wat al so lank bekend is, dat Goya amper ‘n honderd jaar gelede hierdie skildery geverf het:

(Toegegee, dis seker nie heeltemal hoekom Goya hierdie skildery geverf het nie.)

Of wag, lees ek nou die artikel verkeerd? Is een van die skrywer se teorieë juis dat kinders teen kindermoord beskerm moet word deur die vaders en daarom is daar een of ander primêre drang wat meer gesofistikeerd geraak het deur die jare wat veroorsaak dat die pa nie voet in die wind slaan nie?

Van een ding is ek seker. Kinders verstewig die eg en kinders plaas ook die verbintenis onder druk. Dalk moet ek nie vir Nigella Lawson en ‘n onlangse rusie met haar nou-vervreemde man juis oor die kinders by die gesprek betrek nie. Maar ek het nie so ‘n sensasionele voorbeeld nodig om my punt te illustreer nie. Elke dag speel alledaagse voorbeelde hom af in elke huishouding met kinders, ek is oortuig daarvan. Hoe meer siele, hoe meer verskille.

Tog, as my geliefde vir my op ‘n wintersaand Milo in die bed bring te midde van blogbepeinsinge, sluit hierdie aap eerder maar af met Olga Kirsch se gedig “Huwelik”:

‘n Jaar of wat van angs en fel verrassing,
van leer en afleer, lugtige geluk,
dan is daar kinders. Die pynlike aanpassing
wat diens en arbeid verg, die onderdruk
van self, lang dae en nagte sonder rus
maak dat hul al hoe meer mekaar beskou
as ouers, bondgenote in kommernis
en vreugde, maar bysaaklik man en vrou.

Skielik is dit ‘n afgemaakte taak.
In leë kamers sien hul mekaar weer raak –
vergete rykdom. Albei het diep gely,
veel prysgegee en baie bygekry.
In die stil huis ontdek hul weer mekaar
soos, in ‘n veraf tuin, die eerste paar.

Groete, Naomi M

Wil jy sien hoeveel mense lees jou bloginskrywings?

July 29, 2013 in Geen Kategorie

Hallo LitNet-bloggers

Hier was die afgelope tyd baie versoeke van bloggers wat wou sien hoeveel mense lees hulle inskrywings. Almal het gevra hoe kan hulle ‘n teller op hul blogs aanbring. By nadere ondersoek is dit nou duidelik wat die probleem was: dis nie moontlik vir individue om self die blogteller op te stel nie. Die blogplatform is nooit so opgestel nie. Dis wel moontlik vir my, as blogadministrateur, om die teller namens individuele bloggers op te stel. So lyk die tellertjie (dit lê onderaan my blog in die regterkantste kolom):

Diegene wat belangstel om ook so ‘n teller op hul blogs aangebring wil hê, kan vir my ‘n e-pos stuur dat ek dit op die individuele blogs aanbring.

Stuur vir my e-pos na naomimeyer@litnet.co.za. Ek sal aan elke e-pos aandag gee en die tellers aanbring so gou dit menslik moontlik is.

Baie dankie, groete, Naomi M

LitNet se leserspeiling

July 19, 2013 in Geen Kategorie

As iemand ‘n miljoen rand op Who wants to be a millionaire? wil wen, kan hy ‘n vriend om hulp nader. As die kulkunstenaar nodig het dat ‘n kind uit die gehoor op die verhoog by hom kom staan sodat hy al die res van die skare se oë kan verblind deur hul aandag af te trek van waarmee hy eintlik besig is, vra hy ‘n vrywillige maatjie om sy hand op te steek. Ek sien op Facebook daar’s deesdae skrywers wat verskillende voorbeelde van boekomslae vir hul vriende vertoon en vir sy Facebookvrinne vra van watter een hou hulle die meeste. Ons almal het inligting van mekaar nodig.

LitNet se leserspeiling neem drie minute om te voltooi, ek het dit uitgewerk. Asseblief vertel vir ons wie julle is? Inligting word vertroulik hanteer. En terloops, anonieme blogger, jy hoef glad nie jou naam in te vul nie.

Hier is die skakel na die leserspeiling: Klik hier vir LitNet se leserspeiling.

Baie dankie, rustige naweek vir almal toegewens, Naomi M