Spoor van die perlemoenstropers

June 21, 2013 in Geen Kategorie

In Gansbaai se Great White House word ons met ‘n skedel begroet. Dis nou die groepie van ons wat gister op die spoor van die perlemoenstropers was.

Dis ook die titel van Johan Fourie se omgewingsmisdaadroman, uitgegee deur Naledi. Naledi is die “jong, onafhanklike en gatskop”-uitgewersgroep (om vir Melt Myburgh, hul redaksiehoof aan te haal) wat ‘n paar joernaliste en vryskutskrywers gister met ‘n besoek aan Gansbaai trakteer het.

‘n Kombi het ‘n groepie mense gister vanuit Kaapstad en Stellenbosch tot in Gansbaai vervoer. Hier is die boekbekendstelling gehou.

Johan Coetzee, direkteur van Naledi, verwys in sy gesprek tydens die bekendstelling na “boekspoorsnyers” en “boekbloedhonde”. Hierdie boek is uitgesnuffel met ‘n rede.

Johan Fourie, wat op die foto hierbo ‘n boek vir ‘n joernalis teken, vertel van sy navorsing vir die boek. Perlemoenstropers en renosterstropers is deel van dieselfde misdaadsisteem. Daar is iets soos ‘n piramideskema. Daar is ryk grootbase heel bo en ondertoe raak die vertakkings groter, maar die geld minder. Hoe meer hy praat, hoe meer klink dit alles na misdaadfiksie. Die neerdrukkende aspek van sy vertelling, is dat dit berus op feite en navorsing. Die afwesigheid van polisie en misdaadbestryders by die geleentheid, is opvallend. Hulle is genooi om deel te neem aan die gesprek, maar het kop uitgetrek.

Na die bekendstelling, gaan ons see toe. Letterlik.

Ons gaan besoek ‘n perlemoenplaas, waar ons hoor hoe lank en ingewikkeld dit is om een perlemoendiertjie te laat grootword.

Hoe gemaak as daar niks ander geld is as om onwettig perlemoen uit te haal nie? Geen antwoord op daardie vraag nie. Hierdie outjies lyk dalk primitief en bietjie grillerig. Maar as hulle verdwyn (soos wat besig is om te gebeur), word die hele ekosisteem ontwrig.

Daar is ‘n bussievol mense wat na die besoek diep dink.

Welgedaan, Naledi, dat julle ‘n dapper boek publiseer het. Hoop egter nie die skedel in die dak van die restaurant waar die boekbekendstelling was, is profeties ten opsigte van die oorlewing van perlemoen nie.

4 responses to Spoor van die perlemoenstropers

  1. Ons moet elkeen ons deel doen om die gemors te stop, beginnende by die regering wat nie sy werk doen nie.

  2. Interessant, dankie.

  3. Mens voel eintlik moedeloos oor al hierdie dinge,maar armoede ken geen skaamte nie.Voordat bevolkingsgroei nie in die bek geruk word nie,is ek bevrees dat alles net erger gaan word,totdat daar later niks meer oor is nie..geen wilde dier,insek,vis of geveerde nie.

  4. Dankie vir die artikel. Saam met al die ander omgewingskwessies van ons land kan ek nie help om te dink aan die skrywe wat aan Chief Seatle toegedig is nie rakende die westerse houding jeens die omgewing. Mag ons nooit te moedeloos raak om ons deeltjie by te dra al is dit hoe klein nie en om die bewustheid te skep in ons gesprekke en artikels soos die.

Leave a Reply