Profile photo of Vloei

by

Ou paaie en Nuwe paaie

Maart 24, 2014 in Uncategorized

Die pad  Tweefontein toe is weg. Die bos het dit terug gevat. Hoeveel jaar gelede is dit wat ek die rantsoene en veldwagters hier moes kom aflaai? Ek kriskras deur die sekelbos ruigtes maar daar het nie eers ‘n oopgetrapte wildspaadjie oorgebly nie. Agter my sukkel die uitlanders met die dorings. Die twee Hollandse knape moet koes-koes loop (dit het sy voordele om aan die kort kant te wees in die soort terrein!). Die twee Amerikaanse en Noorweegse dametjies volg ‘n entjie agter die langmanne, rooi in die gesig van die herfshitte en die ekstra gewig wat hulle saamdra.

 

Ek is nou veldgids en nie meer veldwagter nie. Die .375 is swaar in my regterhand ……. ek versit die geweer na die linkerhand en dink aan die ironie; voorheen het ek hier geloop met die R1 oor my skouer om die diere teen die mens te beskerm, nou’s dit andersom.

 

Die aand het ons om die vuur gesit. Ek het vir my groepie vleis gebraai en hulle gewys hoe om hulle eie stokbrood te maak. Die Hollanders het grappies gemaak en die draak gesteek met Duitse stereo tipes, die ander het oor een of ander tv-reeks gepraat en en nog een het probeer boodskappe stuur op sy i-phone. Dis hier waar ek nou veronderstel is om die klomp te vermaak met my bosstories en gevatte kwinkslae. Ek was net nie lus nie en gelukkig was die klomp moeg en het gou ingekruip. Vir ‘n ruk het ek terug geloop op ‘n paar ou paaie voor die sandman my ook gekry het.

 

Ons het heelwat grootwild gekry maar die renosters het ons ontwyk. Ek kon hulle spore vir die buitelanders wys en self vars mis maar daar was nie tyd om die spore te vat en te gaan soek nie, ons was op ‘n streng tydskedule! Oppad terug lughawe-toe om die Spanjaard te gaan aflaai moes ek mooi kyk waar om te ry. Dis ‘n nuwe pad vir my (in meer as een opsig).

8 antwoorde op Ou paaie en Nuwe paaie

  1. tina10 het gesê op Maart 24, 2014

    Welkom terug.

    Ek lees nog net so lekkker by jou soos altyd

  2. Hoe kan ek ook so lekker job kry? Ek kan ook proffesioneel fotos neem, kitaar speel en sing om gaste te vermaak….sal dit help?

    • Vloei het gesê op Maart 24, 2014

      Ek’s nie so goed op die vermaak afdeling nie. Miskien moet ek een of ander blikskottel daarvoor kry 🙂

  3. Godiva het gesê op Maart 24, 2014

    More Vloei,

    dit is ‘n aardige gevoel om terugtestap op daardie immer bekende/nuut onbekende paaie en roetes.
    ‘n Vriendin het ‘n paar weke terug fotos vir my gestuur van ons dorpshuis, die nostalgie was bitter soet en seer as dit sin maak. Die plaashuise wou ‘n verlangse familielid ‘n ruk terug ook van fotos stuur, ek het decline, dit sou net TE seer wees om dit te sien want beide plase wat huise opgehad het is glo net vervalle murasies nou. Stap egter nog gereeld in my drome op ons grond en verkies om dit so te onthou.

  4. Jy kry seker nie baie mense wat met ‘n diepe belangstelling na die natuur kyk nie. Vir meeste is dit seker om die bucket list af te merk. Of is ek heel verkeerd….

    • Vloei het gesê op Maart 24, 2014

      Ek probeer om te fokus op sulke mense maar dis waar dat dit eerder die uitsondering as die reel is …

Laat 'n Antwoord

Jou e-posadres sal nie gepubliseer word nie. Vereiste velde word aangedui as *.